မြူနစ် (NSS) - ဒီဇင်ဘာ ၃

ရန်ကုန်တိုင်း၊ ခရမ်းမြို့နယ်ရှိ လုံခြုံရေးစခန်းတစ်ခုကို PDF အဖွဲ့က Drop ဗုံးဖြင့် လာရောက်ပစ်ခတ်မှုဖြစ်ပွားခဲ့ကြောင်း သတင်းရရှိသည်။

ဖြစ်စဉ်မှာ ယမန်နေ့(ဒီဇင်ဘာ ၂ ရက်) ည ၇ နာရီအချိန်ခန့်တွင် ခရမ်းမြို့နယ်၊ ဘုရားပျိုကျေးရွာ၊ မြသိန်းတန်ဘုန်းကြီးကျောင်းအနီးရှိ လုံခြုံရေးစခန်းတွင် ဖြစ်ပွားခဲ့ခြင်းဖြစ်ကြောင်း လုံခြုံရေးအဖွဲ့နှင့်နီးစပ်သူက NP News ကို ပြောသည်။

“ဖြစ်စဉ်ရှိခဲ့တာတော့ ဟုတ်တယ်။ ရဲစခန်းလေးပါ။ အဲဒီအနားမှာက တပ်ကလည်းရှိတယ်။ ဒရုန်းနဲ့ရော၊ လက်ပစ်ဗုံးနဲ့ရော  လာပစ်တာပါ။ ဘေးက ဘုန်းကြီးကျောင်းရဲ့မှန်တွေတော့ ကွဲသွားတယ်။ တခြားဘာမှ ထိခိုက်တာမရှိဘူး” ဟု လုံခြုံရေးအဖွဲ့နှင့်နီးစပ်သူက ပြောသည်။

ထိုသို့လုံခြုံရေးစခန်းအား လာရောက်ပစ်ခတ်သော PDF အဖွဲ့ကို လုံခြုံရေးအဖွဲ့ကလည်း တန်ပြန်ပစ်ခတ် ရှင်းလင်းမှုများပြုလုပ်ခဲ့ကြောင်း သိရသည်။

“ပြန်ပြီးတော့ လိုက်ပစ်တော့ ထွက်ပြေးတာ တန်းနေတာပဲ။ ရွာထဲကလူတွေလည်း ဝိုင်းပြီးလိုက်တာမျိုးတွေ ရှိတယ်။ အဲဒါတွေကို လက်မခံချင်ကြဘူးထင်တယ်။ ဒီလိုမျိုးဖြစ်စဉ်တွေဖြစ်လာရင် ရွာမှာက ထိခိုက်မှုတွေ ရှိလာနိုင်တယ်လေ” ဟု လုံ ခြုံရေးအဖွဲ့နှင့်နီးစပ်သူက ဆိုသည်။

ပြီးခဲ့သော နိုဝင်ဘာလကုန်ပိုင်းတွင်လည်း ခရမ်းမြို့နယ်အတွင်းရှိ လုံခြုံရေးစခန်းအချို့ကို PDF အဖွဲ့က လာရောက်ပစ်ခတ် ထွက်ပြေးသည့်ဖြစ်စဉ် ဖြစ်ပွားခဲ့ဖူးကြောင်း သိရသည်။