Pearl (NSS) - ဒီဇင်ဘာ ၂

ဗိုလ်တထောင်မြို့နယ်၌ ဒေါ်လာရောင်း/ဝယ်လုပ်ကိုင်သော အမျိုးသား သေနတ်ဖြင့် ခြိမ်းခြောက်လုယက်ခံခဲ့ရကြောင်း လုံခြုံရေးတပ်ဖွဲ့နှင့်နီးစပ်သူတစ်ဦးထံမှ သိရသည်။ 

ဖြစ်စဉ်မှာ ယမန်နေ့ (ဒီဇင်ဘာလ ၁ရက်)၊ နေ့လည် (၃)နာရီခန့်တွင် ရန်ကုန်တိုင်း၊ ဗိုလ်တထောင်မြို့နယ်၊ အမှတ်(၈)ရပ်ကွက်၊ မဟာဗန္ဓုလလမ်း နှင့် ၄၁ လမ်းထိပ်တွင် ဖြစ်ပွားခဲ့ခြင်းဖြစ်သည်။ 

လှိုင်မြို့နယ်တွင်နေထိုင်သည့် ဒေါ်လာရောင်း/ဝယ်ပြုလုပ်သူ အမျိုးသားတစ်ဦးသည် အဆိုပါ (၄၁)လမ်းထိပ်တွင်ထိုင်နေစဉ် မဟာဗန္ဓုလလမ်းအတိုင်းမောင်းလာသည့် အငှားယာဉ် (၂) စီးပေါ်မှ လူ(၉)ဦးခန့် ဆင်းလာပြီး လက်လုပ်သေနတ်အတို (၁)လက်ပြ၍ ခြိမ်းခြောက်မှုပြုလုပ်ကြောင်း သိရသည်။ 

ထိုသို့ ခြိမ်းခြောက်ကာ ၎င်းထံမှ စုစုပေါင်း ကျပ်သိန်း ၁၀၀၀ ခန့် တန်ဖိုးရှိ မြန်မာငွေ နှင့်  ဒေါ်လာများကို ယူဆောင်ကာ ဖမ်းဆီးခေါ်ဆောင်သွားခဲ့ကြောင်း သိရသည်။ 

ယင်းကဲ့သို့ ဖမ်းဆီးခေါ်ဆောင်သွားပြီးနောက် ဒဂုံမြို့သစ်တောင်မြို့နယ်အတွင်း၌ ၎င်းအား ပြန်လည်လွှတ်ပေးခဲ့ကြောင်း သိရသည်။

လက်ရှိတွင် သက်ဆိုင်ရာ တာဝန်ရှိသူများအနေဖြင့် သေနတ်ပြလုယက်သူအဖွဲ့အား ဖမ်းဆီးရမိရေးအတွက် ဆက်လက်ဆောင်ရွက်လျက်ရှိကြောင်းသိရသည်။ 

အလားတူ ပြီးခဲ့သည့် ၂၀၂၂ ခုနှစ်၊ နိုဝင်ဘာလ(၁၂)ရက်တွင် မင်္ဂလာတောင်ညွန့်မြို့နယ်၊ သိမ်ဖြူလမ်း၊ တွင် ဖွင့်လှစ်ထားသော Ye Min Aung Money Changer တွင် အမျိုးသား(၃)ဦးက သေနတ်များ၊ ဓားများဖြင့် ခြိမ်းခြောက်၍ ဆိုင်အတွင်းရှိ ငွေကျပ်သိန်း(၃ဝဝ)နှင့် I phone တို့အား ဓားပြတိုက်ယူဆောင်သွားသည့် ဖြစ်စဉ် ဖြစ်ပွားဖူးသည်။