သန့်ဇင် (NSS) - နိုဝင်ဘာ ၂၇

မန္တလေးတိုင်း၊ ပြင်ဦးလွင်မြို့တွင် HIJET ကားအရှိန်လွန်ဝင်တိုက်မှုကြောင့် အမျိုးသမီး(၂)ဦးသေဆုံးခဲ့ပြီး ထိခိုက်ဒဏ်ရာရရှိသူ (၁၀)ဦးထိရှိခဲ့ကြောင်း ဒေသခံလူမှုကူညီရေးအသင်းထံမှ သိရသည်။

ယာဉ်တိုက်မှုသည် ယမန်နေ့(နိုဝင်ဘာလ ၂၆ ရက်)၊ ညနေပိုင်းအချိန်တွင် ပြင်ဦးလွင်မြို့၊ ရပ်ကွက်ကြီး(၁၂)၊ ပြင်ဦးလွင်စင်တာအနီးတွင် ဖြစ်ပွားခဲ့ခြင်းဖြစ်ကြောင်း သိရသည်။

“HIJET ကားက အရှိန်လွန်ပြီး ရှေ့ကမောင်းနေတဲ့ဆိုင်ကယ်နဲ့ လူတစ်ချို့ကို ဝင်ပြီးတိုက်မိတာပါ” ဟု ဒေသခံလူမှုကူညီရေးအသင်းမှ တာဝန်ရှိသူတစ်ဦးက NSS ကိုပြောသည်။

ဖြစ်စဉ်ကြောင့် ဆိုင်ကယ်ပေါ်မှ အမျိုးသမီး(၂)ဦးနှင့် အခြားအမျိုးသား၊ အမျိုးသမီး(၁၀)ဦးတို့တွင် ထိခိုက်ဒဏ်ရာများရရှိခဲ့ကြောင်း သိရသည်။ ထိခိုက်ဒဏ်ရာရရှိသူများထဲတွင် စိုးရိမ်ရသူများလည်း ပါဝင်ပြီးဒေသခံလူမှုကူညီရေးအသင်းဝင်များက မြေပြင်ကုသမှုများပြုလုပ်ပေးပြီးနောက် ပြင်ဦးလွင်မြို့ပြည်သူ့ဆေးရုံ နှင့် မန္တလေးမြို့ပြည်သူ့ဆေးရုံကြီးတို့သို့ပို့ဆောင်ပေးခဲ့ကြသည်။

ထိုသို့ ပို့ဆောင်ပေးခဲ့သော်လည်း ဆိုင်ကယ်ပေါ်တွင် လိုက်ပါလာသည့် မလဝန်းငယ်(၁၇)နှစ်၊ မယဉ်ယဉ်ဝိုင်း(၂၁)နှစ်တို့မှာ ရရှိခဲ့သည့် ဒဏ်ရာများဖြင့် မန္တလေးမြို့ပြည်သူ့ဆေးရုံ၌ သေဆုံးသွားခဲ့ကြောင်း သိရသည်။

ထို့ကြောင့် သေဆုံးသူအမျိုးသမီး(၂)ဦး၏ရုပ်အလောင်းများအား မန္တလေးမြို့ပြည်သူ့ဆေးရုံကြီးမှတစ်ဆင့် ပြင်ဦးလွင်မြို့သို့ ဒေသခံလူမှု ကူညီရေးအသင်းကားဖြင့် ပြန်လည်သယ်ဆောင်လာကာ မနက်ဖြန် (နိုဝင်ဘာလ ၂၈ ရက်)တွင် ပြင်ဦးလွင်မြို့ရှိ (၈)မိုင်သုသာန်၌ သင်္ဂြိုလ်သွားမည်ဖြစ်ကြောင်း သိရသည်။