ကျော် (NSS) - နိုဝင်ဘာ ၂၃

လောက်ကိုင်မြို့၌ စစ်ဘေးရှောင်ကား လက်နက်ကြီးကျည်ထိမှုန်မှုဖြစ်ပွားခဲ့ကြောင်း နယ်မြေသတင်းများအရ သိရသည်။

စစ်ဘေးရှောင်ကားအား တပ်မတော်မှပစ်ခတ်ခြင်းဖြစ်ကြောင်း သတင်းများထွက်ပေါ်ခဲ့ပြီး အဆိုပါ သတင်းနှင့်ပတ်သက်၍ သတင်းအမှားသာဖြစ်ကြောင်း နစက က ယမန်နေ့ (နိုဝင်ဘာလ ၂၂ ရက်) ညပိုင်းက ထုတ်ပြန်ခဲ့သည်။

လူမှုကွန်ယက်စာမျက်နှာများ၌ ယမန်နေ့ (နိုဝင်ဘာလ ၂၂ ရက်)၊ နံနက် ၉ နာရီခွဲခန့်က လောက်ကိုင်မြို့တွင် စစ်ဘေးရှောင်ကားတစ်စီး ဒုံးကျည်ထိမှန်ကာ သေဆုံးမှုနှင့်ထိခိုက်ဒဏ်ရာရသူများရှိခဲ့ရာ ယင်း ဒုံးကျည်ကို ဒေသကွပ်ကဲမှုစစ်ဌာနချုပ် (လောက်ကိုင်)မှပစ်ခတ်ခြင်းဖြစ်သည်ဟု MNDAA ပြန်ကြားရေးတာဝန်ခံ လီကျားဝင်းက ပြောကြားခဲ့သည်ဟု သတင်းများထွက်ပေါ်ခဲ့သည်။

စစ်ဘေးရှောင်ကား လက်နက်ကြီးကျည်ထိမှန်မှုမှာ မှန်ကန်သော်လည်း တပ်မတော်မှပစ်ခတ်ခြင်းမဟုတ်ဘဲ လက်နက်ကိုင်အဖွဲ့ဝင်များက တပ်မတော်စခန်းတစ်ခုအား ပစ်ခတ်ရာမှ စစ်ဘေးရှောင်ကားကိုထိမှန်ပျက်ဆီးခဲ့ခြင်းသာဖြစ်သည်ဟု နစက ကထုတ်ပြန်ခဲ့သည်။

လက်နက်ကိုင်အဖွဲ့ဝင်များသည် ဒေသအတွင်းမတည်မငြိမ်ဖြစ်စေရန်၊ ဒေသခံတိုင်းရင်းသားများအားအကြောက်တရားဖြင့် ၎င်းတို့အား ထောက်ခံအားပေးလာစေရန် နှင့် တပ်မတော်ကို အထင်အမြင်လွဲမှားစေရန် ရည်ရွယ်၍ ထိုသို့ သတင်းမှားများဖြန့်ဝေလျက်ရှိသည်ဟုလည်း နစက ကထုတ်ပြန်ခဲ့သည်။

ထို့ပြင် လူမှုကွန်ယက်စာမျက်နှာများ၌ စစ်ကိုင်းတိုင်း၊ ဘုတလင်မြို့ရှိ ဘုတလင်မြို့ပြည်သူ့ဆေးရုံမှကျန်း မာရေးဝန်ထမ်းများ CDM ပြုလုပ်ခဲ့သဖြင့် တပ်မတော်က ဆေးရုံအားချိတ်ပိတ်လိုက်သည်ဆိုခြင်းမှာလည်း သတင်းအမှားသာဖြစ်သည်ဟု နစက က ဆက်လက်ထုတ်ပြန်ခဲ့သည်။

ဖြစ်စဥ်တွင် ဘုတလင်မြို့အတွင်းသို့ PDF အဖွဲ့ဝင်များမှ နိုဝင်ဘာလ ၁၉ ရက်က လက်နက်ကြီးများဖြင့်ပစ်ခတ်ခဲ့ရာ လက်နက်ကြီးကျည်အချို့သည် ဘုတလင်မြို့ပြည်သူ့ဆေးရုံဝင်းအတွင်း၌ကျရောက်ပေါက်ကွဲမှုများဖြစ်ပေါ်ခဲ့သည်။

ထို့ကြောင့် ဆေးရုံအတွင်း လက်နက်ကြီးကျည်များထပ်မံကျရောက်ပေါက်ကွဲနိုင်သဖြင့် မြို့နယ်ဆရာဝန်နှင့်ကျန်းမာရေးဝန်ထမ်းများသည် ဆေးရုံမှခေတ္တထွက်ခွာခဲ့ခြင်းသာဖြစ်ပြီး CDM ပြုလုပ်ခဲ့ကြခြင်းမရှိကြောင်း နစက ကထုတ်ပြန်ခဲ့သည်။