ကျော် (NSS) - နိုဝင်ဘာ ၁၄

မြန်မာ-ဗီယက်နမ်နှစ်နိုင်ငံ ကုန်သွယ်မှုပူးပေါင်းဆောင်ရွက်နိုင်ရေးအလားအလာများကို ဗီယက် နမ်နိုင်ငံဆိုင်ရာ မြန်မာသံအမတ်ကြီးဦးကျော်စိုးဝင်းနှင့် ဗီယက်နမ်-မြန်မာချစ်ကြည်ရေးအသင်း ဥက္ကဋ္ဌ Mr. Chu Cong Phung တို့ဆွေးနွေးခဲ့ကြသည်။

မြန်မာသံအမတ်ကြီး ဦးကျော်စိုးဝင်းမှ ဗီယက်နမ် -မြန်မာချစ်ကြည်ရေးအသင်း ဥက္ကဋ္ဌ Mr. Chu Cong Phung ၊ ဗီယက်နမ် နှင့် မြန်မာစီးပွားရေးလုပ်ငန်းရှင်များအား နိုဝင်ဘာလ ၁၀ ရက်က မြန်မာသံရုံးတွင် လက်ခံတွေ့ဆုံခဲ့ကြောင်း သိရသည်။

တွေ့ဆုံစဥ် မြန်မာ-ဗီယက်နမ်နှစ်နိုင်ငံ ကုန်သွယ်မှုနှင့်ပူးပေါင်းဆောင်ရွက်နိုင်မည့် အလားအလာများကို ဆွေးနွေးခဲ့ကြကြောင်း သိရသည်။

ထို့ပြင် ဗီယက်နမ်ကုမ္ပဏီများမှ ၎င်းတို့ကုန်သွယ်မှုဆောင်ရွက်ရာတွင်ကြုံတွေ့ရသည့် အခက်အခဲများကို ရှင်းလင်းတင်ပြရာ သံအမတ်ကြီးက အတတ်နိုင်ဆုံး ညှိနှိုင်းဆောင်ရွက်ပေးသွားမည်ဟု ပြောကြားခဲ့သည်။

တွေ့ဆုံပွဲကို မြန်မာ-ဗီယက်နမ်နှစ်နိုင်ငံကုမ္ပဏီများအား ရေရှည်အကျိုးစီးပွားအတွက် Business to Business မိတ်ဆက်သည့်အနေဖြင့် ပြုလုပ်ခြင်းဖြစ်ကြောင်း သိရသည်။