မြူနစ် (NSS) - နိုဝင်ဘာ ၁၁

ရန်ကုန်တိုင်း၊ မြောက်ဥက္ကလာပမြို့နယ် ဥပဒေရုံးရှေ့၌ ဗုံးပေါက်ကွဲမှု (၂)ကြိမ်ဖြစ်ပွားခဲ့ကြောင်း လုံခြုံရေးအဖွဲ့နှင့်နီးစပ်သူတစ်ဦးက NSS ကို ပြောသည်။

ဗုံးပေါက်ကွဲမှုဖြစ်စဉ်သည် ယမန်နေ့(နိုဝင်ဘာလ ၁၀ ရက်)၊ ည ၉ နာရီ ၁၅ မိနစ်အချိန်တွင် မြောက်ဥက္ကလာပမြို့နယ်၊ (ဆ)ရပ်ကွက်၊ သမာဓိလမ်းပေါ်ရှိ မြို့နယ်ဥပဒေရုံးရှေ့၌ ပထမအကြိမ်ပေါက်ကွဲခဲ့ကြောင်း သိရသည်။

အဆိုပါပေါက်ကွဲမှုဖြစ်စဉ်အား လုံခြုံရေးအဖွဲ့ဝင်များက သွားရောက်စစ်ဆေးစဉ် ပထမအကြိမ်ပေါက်ကွဲမှုဖြစ်ပွားခဲ့သော နေရာနှင့် (၁၀)ပေခန့်အကွာ မြို့နယ်ဥပဒေရုံးရှေ့၌ပင် ဒုတိယအကြိမ် ထပ်မံပေါက်ကွဲခဲ့ကြောင်း သိရသည်။

မြောက်ဥက္ကာလာပမြို့နယ် ဥပဒေရုံးရှေ့၌ ဖြစ်ပွားခဲ့သော ဗုံးပေါက်ကွဲမှုဖြစ်စဉ်(၂)ခုသည် (၁၅)မိနစ်သာအချိန်ခြား၍ ပေါက်ကွဲခဲ့ခြင်းဖြစ်ကြောင်းလည်း လုံခြုံရေးအဖွဲ့နှင့်နီးစပ်သူက ပြောသည်။

သို့သော် ယင်းကဲ့သို့ဗုံးပေါက်ကွဲမှုဖြစ်စဉ်ကြောင့် လူထိခိုက်ဒဏ်ရာရရှိမှုနှင့် ပစ္စည်းထိခိုက်ပျက်စီးမှု မရှိခဲ့ကြောင်းလည်း ၎င်းက ထပ်မံပြောသည်။

ထို့အတူ ယမန်နေ့ (နိုဝင်ဘာလ ၁ဝ ရက်) ညနေပိုင်းတွင်လည်း ရန်ကုန်တိုင်း၊ မြောက်ဥက္ကလာပမြို့နယ် ၌ ရွှေဆိုင်ပိုင်ဆိုင်ရှင်အမျိုးသမီးတစ်ဦးကို အမျိုးသား(၃)က သေနတ်ဖြင့်ပစ်ခတ်ကာ ကျပ်သိန်းပေါင်းများစွာတန်ဖိုးရှိ ရွှေထည်ပစ္စည်းများကို ဓါးပြတိုက်လုယက်မှုဖြစ်ပွားခဲ့သေးသည်။