Pearl (NP News) - မတ် ၁

မွန်ပြည်နယ်၊ မုဒုံမြို့နယ်တွင် ကားတစ်စီးတိမ်းမှောက်ရာ အမျိုးသားတစ်ဦးသေဆုံးပြီး တစ်ဦးဒဏ်ရာရရှိခဲ့ကြောင်း မြန်မာ့လူငယ်(မုဒုံ) အရေးပေါ်ကယ်ဆယ်ရေးအဖွဲ့မှ သိရသည်။ 

ဖြစ်စဉ်မှာ ယနေ့ (မတ်လ ၁ ရက်)၊ နံနက် (၉)နာရီ၊ (၃ဝ)မိနစ် အချိန်ခန့်တွင် မွန်ပြည်နယ်၊ မုဒုံမြို့နယ်၊ တာပသွန်ကျေးရွာအနီးတွင် အထက်ပါကဲ့သို့ ဖြစ်ပွားခဲ့ကြောင်း သိရသည်။ 

အဆိုပါ ကျေးရွာအနီး ရွှေရည်ဖူးတည်းခိုခန်းအရှေ့တွင်ကားတစ်စီးအရှိန်လွန်၍ သစ်ပင်အားဝင်တိုက်မိပြီး တိမ်းမှောက်နေခဲ့ကြောင်း သိရသည်။ 

“မနက်(၉)နာရီခွဲဝန်းကျင်လောက်က ဖြစ်တာ။ မော်လမြိုင်ကနေ မုဒုံကို ကောက်ရိုးတွေတင်ပြီး မောင်းလာတာ။ အဲဒီမှာ ကားပိတ်တော့ ညာဘက်ကနေ ကျော်တတ်ဖို့မောင်းတာကို မောင်းတဲ့ကောင်လေးက မကျွမ်းကျင်တော့ သစ်ပင်ကို ဝင်တိုက်မိပြီး ကားမှောက်သွားတာပါ” ဟု မြန်မာ့လူငယ်(မုဒုံ) အရေးပေါ်ကယ်ဆယ်ရေးအဖွဲ့၏တာဝန်ရှိသူတစ်ဦးက NP News ကို အတည်ပြုပြောဆိုထားသည်။ 

ထိုသို့ ကားတိမ်းမှောက်မှုကြောင့်  ယာဉ်မောင်းဖြစ်သူအမျိုးသားသည် ဖြစ်စဉ်နေရာမှ မော်လမြိုင်ပြည်သူ့ဆေးရုံသို့ ပို့ဆောင်စဉ် သေဆုံးသွားခဲ့ကြောင်း သိရသည်။  

၎င်းနှင့်အတူပါလာသော ယာဉ်နောက်လိုက်မှာနားရွက်ပြတ်ရှဒဏ်ရာနှင့် ၊ညာလက်တွင်ကျိုးပဲ့ဒဏ်ရာရရှိခဲ့ပြီး လက်ရှိတွင် စိုးရိမ်ဖွယ်ရာ အခြေအနေမဟုတ်ကြောင်း သိရသည်။

ယာဉ်မောင်းဖြစ်သူသည် ချောင်းဆုံမြို့နယ်၊ ကုလားပြည်ကျေးရွာတွင်နေထိုင်သော မောင်မျိုးလှိုင်ဝင်းဆိုသူဖြစ်ပြီး  ယာဉ်နောက်လိုက်ဖြစ်သူသည် ချောင်းဆုံမြို့နယ်၊ မရမ်းကျေးရွာတွင်နေထိုင်သော မောင်ရဲသူဖြစ်ကြောင်း အရေးပေါ်ကယ်ဆယ်ရေးအဖွဲ့ထံမှ သိရသည်။