သန့်ဇင် (NSS) - အောက်တိုဘာ ၂၃

ကရင်ပြည်နယ်၊ ဘားအံမြို့တွင် တွဲကားမှ ဘီးကျွတ်ပြီး ဆိုင်ကယ်အားထိမှန်ခဲ့ရာ ဆိုင်ကယ်မောင်းနှင်သူအမျိုးသားတစ်ဦး ထိခိုက်ဒဏ်ရာများရရှိခဲ့ကြောင်း သတင်းရရှိသည်။

ဖြစ်စဉ်မှာ ယမန်နေ့ (အောက်တိုဘာလ ၂၂ ရက်)၊ ညနေ ၆ နာရီအချိန်တွင် ဘားအံမြို့အဝင် သံလွင်တံတားအဆင်း၌ ဖြစ်ပွားခဲ့ကြောင်း မာဃလူမှုကူညီရေးအသင်းထံမှ သိရသည်။

“တွဲကားကြီးကသွားနေရင်ကနေ ဘီးကျွတ်ပြီး တစ်ဖက်က ဆိုင်ကယ်ကိုသွားမှန်တာဗျ။ ဆိုင်ကယ်ကလည်း မောင်းနေတဲ့အရှိန်နဲ့ဆိုတော့ လဲကွဲပြီး ထိခိုက်ဒဏ်ရာတွေရတာပေါ့” ဟု မာဃလူမှုကူညီရေးအသင်းမှ တာဝန်ရှိသူတစ်ဦးက NSS ကိုပြောသည်။

အဆိုပါဖြစ်စဉ်တွင် တွဲကားဘီးထိမှန်ခဲ့သည့် ဆိုင်ကယ်မှ အသက်(၄၀)ဝန်းကျင် မြိုင်ကလေးမြို့တွင်နေထိုင်သည့် ဆိုင်ကယ်ယာဉ်မောင်း အမျိုးသားသည် ဦးခေါင်းနှင့် လက်မောင်းတို့တွင် ပေါက်ပြဲထိခိုက်ဒဏ်ရာများရရှိခဲ့ကြောင်း သိရသည်။

ထို့နောက် ၎င်းအမျိုးသားအား မာဃလူမှုကူညီရေးအသင်းမှ တောင်ကလေးစစ်ဆေးရုံသို့ ပို့ဆောင်ကူညီပေးခဲ့ကြောင်း သိရသည်။