စော (NSS) - အောက်တိုဘာ ၂၂

မလေးရှားနိုင်ငံ၌  အရက်အလွန်အကျွံသောက်ပြီး ကြမ်းပြင်ပေါ်တွင် အိပ်ခဲ့သည့် မြန်မာအမျိုးသားတစ်ဦး သေဆုံးသွားကြောင်း သိရသည်။

မြန်မာလူမှုကူညီရေးအသင်း(မလေးရှား)မှ ယနေ့(အောက်တိုဘာလ ၂၂ ရက်)တွင် အထက်ပါကဲ့သို့ထုတ်ပြန်ထားခြင်းဖြစ်သည်။

မြန်မာအမျိုးသားတစ်ဦးသည် ယမန်နေ့(အောက်တိုဘာလ ၂၁ ရက်) ညတွင် အရက်အလွန် အကျွံသောက်မိပြီး ရင်ထဲတွင် ပူလောင်နေခြင်းကြောင့် ကြမ်းပြင်ကွန်ကရစ်ပေါ်တွင် အိပ်ခဲ့ကြောင်း သိရသည်။

ထို့သို့ အိပ်ပျော်သွားခဲ့ရာ ယနေ့(အောက်တိုဘာလ ၂၂ ရက်)တွင် သေဆုံးနေခြင်းကြောင့် ၎င်း၏ သူငယ်ချင်းမှ လာရောက်အကူအညီတောင်းခံခဲ့ရာ ၎င်း၏ရုပ်အလောင်းအား မလေးရှားနိုင်ငံ စာန်းဆေးရုံကြီးသို့ ပို့ဆောင်ခဲ့ကြောင်း သိရသည်။

အဆိုပါ အမျိုးသားသည် ကိုကျော်သူရဖြစ်ပြီး မလေးရှားနိုင်ငံ၊ စလန်းကောပြည်နယ်၊ ပူချွန်းမြို မာကျု့ဂျာယာရပ်ကွက်ရှိ စက်ရုံတန်းတွင် အလုပ်လုပ်ကိုင်နေသူဖြစ်ကြောင်း သိရသည်။

အလားတူ ပြီးခဲ့သည့် (အောက်တိုဘာလ ၁၈ ရက်)တွင် မလေးရှားနိုင်ငံ၊ ကွာလာလမ်ပူမြို့၊ သမ္မာန်ရှမ်မလင်းရပ်ကွက်တွင်နေထိုင်သူ မြန်မာအမျိုးသားတစ်ဦးသည် အသက်ရှူမဝခြင်းကြောင့် အမ်ပန်းမြို့ဆေးရုံကြီးသို့သွားစဉ် သေဆုံးခဲ့ကြောင်းသိရသည်။

အဆိုပါ အမျိုးသားသည် ကိုလှမြင့် (၂၀)နှစ်ဖြစ်ပြီး ရခိုင်ပြည်နယ်၊ ရသေ့တောင်မြို့နယ် အရှေ့မြောက်ရပ်ကွက်တွင် နေထိုင်ခဲ့သူဖြစ်ကြောင်း သိရသည်။