ယွန်း (NP News) - ဖေဖော်ဝါရီ ၂၆

စားသုံးဆီကို ပြည်ပမှ တင်သွင်းနေရသူအဖြစ်မှ ပြည်ပကိုပြန်လည်တင်ပို့နိုင်သည့် လုပ်ငန်းရှင်ဖြစ်အောင် ပြင်ဆင်မှုများ စတင်ရမည့်အချိန်ဖြစ်ကြောင်း ပြည်ထောင်စုဝန်ကြီးက ဆိုသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးက ပြီးခဲ့သည့် ဖေဖော်ဝါရီလ (၂၄)ရက်တွင် ရန်ကုန်မြို့ရှိ UMFCCI ၌ ကျင်းပခဲ့သော ဆွေးနွေးပွဲတွင် အထက်ပါကဲ့သို့ ပြောဆိုခဲ့ခြင်းဖြစ်သည်။

လက်ရှိတွင် နိုင်ငံတော်အနေဖြင့် ပြည်တွင်းစားသုံးဆီ ဖူလုံရေးနှင့် စားသုံးဆီတိုးမြှင့်ထုတ်လုပ်ရေးတို့အတွက် မူဝါဒများ ချမှတ်အကောင်အထည်ဖော်လျက်ရှိကြောင်း ပြည်ထောင်စုဝန်ကြီးမှ ဆိုသည်။

ထို့ပြင် ဆီတင်သွင်းသူအဖြစ်မှ ပြည်ပသို့ ဆီတင်ပို့သည့် နိုင်ငံအဖြစ်ရောက်ရှိအောင် စတင်ပြင်ဆင်ရန် အချိန်ဖြစ်ကြောင်း ပြည်ထောင်စုဝန်ကြီးက အသိပေးပြောဆိုထားသည်။

မြန်မာနိုင်ငံ၏ ပြည်တွင်းစားသုံးဆီလိုအပ်ချက်ကို ပြည်တွင်းဆီထုတ်လုပ်မှုဖြင့် မဖြည့်ဆည်းနိုင်သဖြင့် နှစ်စဥ်ပြည်ပမှ စားသုံးဆီတန်ချိန် (၈)သိန်းခန့် တင်သွင်းနေရသည်။

ပြည်တွင်း၌ နှစ်စဥ်စားသုံးရန်နှင့် လုပ်ငန်းသုံးရန် ဆီလိုအပ်ချက်တန်ချိန် (၁ ဒသမ ၁)သန်းခန့်ရှိပြီး ဆီလိုအပ်ချက်၏ (၆ဝ) ရာခိုင်နှုန်းခန့်အထိ ပြည်ပမှတင်သွင်းနေရကြောင်း သိရသည်။

ပြည်တွင်းစားသုံးဆီလိုအပ်ချက် ပြည့်မီဖူလုံစေရေးအတွက် လိုအပ်ချက်များကို နိုင်ငံတော်မှ ဖြည့်ဆည်းပေးသွားမည်ဖြစ်ပြီး ဆီထွက်သီးနှံ စိုက်ပျိုးသည့် လုပ်ငန်းရှင်များနှင့် ဆီထုတ်လုပ်သူများကလည်း အမှန်တကယ် အလုပ်လုပ်ကြရန် လိုအပ်ကြောင်း နစကဥက္ကဋ္ဌက ပြောဆိုထားဖူးသည်။

မြန်မာနိုင်ငံအနေဖြင့် ဆီထွက်သီးနှံများဖြစ်သော မြေပဲ၊ နှမ်း၊ နေကြာတို့ကို မကွေး၊ မန္တလေး၊ စစ်ကိုင်း၊ ပဲခူးနှင့် ဧရာဝတီတိုင်းတို့တွင် အဓိက စိုက်ပျိုးကြသည်။

မြန်မာနိုင်ငံတွင် ဆီထွက်သီးနှံစိုက်ဧကသည် စုစုပေါင်းသီးနှံစိုက်ဧက၏ (၁၆ ဒသမ ၉) ရာခိုင်နှုန်းရှိကြောင်း  သိရသည်။

ပြည်တွင်းစားသုံးဆီလိုအပ်ချက်ကို ဖြည့်ဆည်းပေးနိုင်ရေးအတွက် ၂ဝ၂၂-၂ဝ၂၃ ဘဏ္ဍာနှစ်မှစတင်ပြီး နေကြာစိုက် ဧက (၁)သိန်းခွဲတိုးချဲ့စိုက်ပျိုးသွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ အသိပေးထားသည်။