NSS - အောက်တိုဘာ ၁၆

မန္တလေးတိုင်းဒေသကြီး၊ ညောင်ဦးမြို့နယ် ပုဂံရှေးဟောင်းယဉ်ကျေးမှုနယ်မြေရှိ ဟိုတယ်နှင့် မိုတယ်များတွင် အောက်တိုဘာလ(၂၇) ရက်မှစတင်ကာ အွန်လိုင်းမှတစ်ဆင့် အခန်းကြိုတင်ချိတ်ဆက်မှာယူထားမှုများနှင့် ပြည့်နေပြီဖြစ်ကြောင်း သိရသည်။

သီတင်းကျွတ်ကာလတွင် မြန်မာပြည်အရပ်ရပ်မှ ခရီးသွားဘုရားဖူးလေ့လာရေးလာရောက်သူ များပြားလျက်ရှိသည့်အတွက် အောက်တိုဘာလ ပထမပတ်ကတည်းက ဟိုတယ်/မိုတယ်/တည်းခိုရိပ်သာများသို့ ကြိုတင်ချိတ်ဆက်ထားကြခြင်းဖြစ်သည်။ 

ပုဂံရှေးဟောင်းယဉ်ကျေးမှုနယ်မြေသို့  လာရောက်ရာတွင် ပုဂံဒေသရှိ သမိုင်းဝင်အထင်ကရဘုရားများကို ဖူးမြှော်ခြင်း၊ နံရံဆေးရေးပန်းချီများ လေ့လာခြင်း၊ အလှဓာတ်ပုံ ရိုက်ကူးခြင်း၊ လက်ဆွဲပန်းချီ ဆွဲကြခြင်း၊ အချို့ဘုရားဖူးများက မြင်းလှည်းစီးခြင်း၊ E-Bike အဖွဲ့လိုက်ငှားစီးခြင်းများ ပြုလုပ်ကြကြောင်း သိရသည်။

သီတင်းကျွတ် ရုံးပိတ်ရက်ကာလအတွင်း တစ်ရက်လျှင် ဘုရားဖူး ငါးသောင်းကျော်မှ တစ်သိန်းခွဲကျော်အထိ လာရောက်လေ့ရှိရာ ပုဂံ-ညောင်ဦးတွင် ဖွင့်လှစ်ထားရှိသည့် ဟိုတယ်၊ မိုတယ်၊ တည်းခိုခန်း (၈၁)လုံးတွင် အောက်တိုဘာလ (၂၇) ရက်မှ (၂၉) ရက်အထိ ကြိုတင်ချိတ်ဆက်မှာယူထားမှုများ ပြည့်နေပြီဖြစ်ကြောင်း ဟိုတယ်နှင့်ခရီးသွားလာရေး ညွှန်ကြားမှုဦးစီးဌာန (ပုဂံရုံးခွဲ)မှသိရသည်။