Pika (NSS) - အောက်တိုဘာ ၈ 

အစ္စရေးစစ်တပ်နှင့် ဂါဇာကမ်းမြောင်ဒေသရှိ ဟားမတ်စ်စစ်သွေးကြွအဖွဲ့တို့ကြား စစ်ပွဲစတင်ဖြစ်ပွားပြီးနောက် နှစ်ဖက်စလုံးမှ သေဆုံးသူဦးရေမှာ အနည်းဆုံးလူ(၆၆၃)ဦးအထိ ရှိလာပြီဖြစ်ကြောင်း ယနေ့ အောက်တိုဘာလ ၈ ရက်၊ ညနေပိုင်း နောက်ဆုံးရသတင်းများအရ သိရသည်။

ထို့အပြင် နှစ်ဖက်လုံးမှ ထိခိုက်ဒဏ်ရာရရှိသူ ဦးရေမှာ အနည်းဆုံးလူ(၃၈ဝဝ)ဦးထိ ရှိကြောင်း သတင်းများအရ သိရသည်။ 

ဟားမတ်စ်စစ်သွေးကြွအဖွဲ့များ၏ တိုက်ခိုက်မှုကြောင့် အစ္စရေးဖက်မှ အနည်းဆုံးလူ(၃၅ဝ)ဦးသေဆုံးခဲ့ပြီး၊ အခြားလူ(၁၈ဝဝ)ကျော် ထိခိုက်ဒဏ်ရာရရှိခဲ့ကြောင်း သိရသည်။

အစ္စရေးဖက်မှ ပြန်လည်လက်တုံ့ပြန်တိုက်ခိုက်ခြင်းကြောင့် ဂါဇာကမ်းမြောင်ဒေသတွင်နေထိုင်သော ပါလက်စတိုင်းနိုင်ငံသား အနည်းဆုံး(၃၁၃)ဦး သေဆုံးခဲ့ပြီး၊ အခြားလူ(၂)ထောင်နီးပါး ထိခိုက်ဒဏ်ရာရရှိခဲ့ကြောင်း သိရသည်။

ထို့အပြင် ဟားမတ်စ် စစ်သွေးကြွအဖွဲ့များသည် အစ္စရေးစစ်သားများနှင့် အရပ်သားများကို ဓါးစာခံအဖြစ် ဖမ်းဆီးခေါ်ဆောင်သွားကြောင်း သတင်းများအရ သိရသည်။ ဟားမတ်စ်စစ်သွေးကြအဖွဲ့သည် အောက်တိုဘာလ(၇)ရက် နံနက်ပိုင်းတွင် အစ္စရေးကို ဒုံးကျည်ထောင်ချီဖြင့် စတင်ပစ်ခတ်တိုက်ခိုက်ခဲ့ပြီးနောက် အစ္စရေးစစ်တပ်နှင့် ဟားမတ်စ်စစ်သွေးကြွအဖွဲ့များကြား စစ်ပွဲစတင်ဖြစ်ပွားခဲ့ခြင်းဖြစ်ကြောင်း သိရသည်။

အစ္စရေးစစ်တပ် နှင့် ဟားမတ်စ် စစ်သွေးကြွအဖွဲ့ကြား တိုက်ပွဲများ ဆက်လက်ဖြစ်ပွားနေပြီး သေဆုံး/ထိခိုက်ဒဏ်ရာရရှိသူအရေအတွက်မှာ ဆက်လက်တိုးမြင့်လာနိုင်ဖွယ်ရှိနေသည်။ အစ္စရေးစစ်တပ်သည် ဟားမတ်စ်စစ်သွေးကြွအဖွဲ့များအပြင် လက်ဘနွန်စစ်သွေးကြွအဖွဲ့ ဟစ်ဘိုလာအဖွဲ့တို့ကိုလည်း လက်တုံ့ပြန်တိုက်ခိုက်နေကြောင်း သတင်းများတွင် ဖော်ပြထားသည်။

လက်ဘနွန်နိုင်ငံတွင်းမှ အစ္စရေးဖက်သို့ မော်တာများဖြင့် ပစ်ခတ်တိုက်ခိုက်လာပြီးနောက် ယခုကဲ့သို့ပြန်လည်လက်တုံ့ပြန်တိုက်ခိုက်ခဲ့ခြင်းဖြစ်ကြောင်း အစ္စရေးစစ်ဘက်က ထုတ်ဖော်ပြောဆိုထားသည်။