ဂျန်ဇက် (NSS) - အောက်တိုဘာ ၈

အစ္စရေးကာကွယ်ရေးဝန်ကြီးဌာနပြောရေးဆိုခွင့်ရှိသူတစ်ဦးက အစ္စရေးတပ်ဖွဲ့တွေဟာ ဟားမက်စ်အဖွဲ့အပြင် လက်ဘနွန် ပိုင်နက်ထဲကိုလည်း အမြှောက်များနဲ့ ပစ်ခတ်တိုက်ခိုက်မှုများ လုပ်ဆောင်နေတယ်လို့ ထုတ်ဖော်ပြောဆိုလိုက်ပါတယ်။

လက်ဘနွန်နိုင်ငံ ပိုင်နက်အတွင်းကနေ အစ္စရေးနိုင်ငံဘက်ခြမ်းကို မော်တာများနဲ့ ပစ်ခတ်တိုက်ခိုက်လာခဲ့ပြီးနောက် အစ္စရေးစစ်ဘက်က လက်တုံ့ပြန်တိုက်ခိုက်ခဲ့တာဖြစ်ပါတယ်။

အစ္စရေးတပ်ဖွဲ့တွေဟာ Mount Dov  ဒေသကို အမြှောက်တွေနဲ့ပစ်ခတ်တိုက်ခိုက်နေခြင်းဖြစ်ပြီး လက်ဘနွန်စစ်သွေးကြွအဖွဲ့ဖြစ်တဲ့ ဟစ်ဘိုလာအုပ်စုတွေကို စစ်ပွဲထဲ တိုက်ရိုက်ပါဝင်လာခြင်းမျိုးမလုပ်ဖို့ အစ္စရေးစစ်ဘက်က သတိပေးထားပါတယ်။

ဟစ်ဘိုလာစစ်သွေးကြွအုပ်စုဟာ အီရန်နိုင်ငံရဲ့အထောက်အပံ့တွေကို လက်ခံရရှိနေပြီး ၂ဝဝ၆ ခုနှစ်က အစ္စရေး နဲ့ လအတန်ကြာ စစ်ပွဲဖြစ်ခဲ့ဖူးကြောင်း သိရပါတယ်။ အစ္စရေးဟာ ပြီးခဲ့တဲ့ ဇူလိုင်လအတွင်းကလည်း လက်ဘနွန်နိုင်ငံပိုင်နက်အတွင်းကနေ တင့်ကားဖျက်ဒုံးကျည်များနဲ့ ပစ်ခတ်တိုက်ခိုက်မှုတွေကို အမြှောက်တွေနဲ့ လက်တုံ့ပြန်တိုက်ခိုက်ခဲ့ကြောင်းသိရပါတယ်။

အစ္စရေးကာကွယ်ရေးဝန်ကြီးက "အစ္စရေးပိုင်နက်အတွင်းကို လက်ဘနွန်ပိုင်အတွင်းကနေ မော်တာတွေနဲ့တိုက်ခိုက်ခဲ့ပြီးနောက် မိနစ်ပိုင်းအကြာမှာပဲ ကျွန်တော်တို့ကလည်း လက်ဘနွန်ပိုင်နက်ထဲကိုအမြှောက်တွေနဲ့ ပြန်လည်ပစ်ခတ်တိုက်ခိုက်ခဲ့တယ်" လို့ ပြောပါတယ်။ 

ဟစ်ဘိုလာ စစ်သွေးကြွအုပ်စုတွေဟာ ဂိုလန်ကုန်းမြင့်ဒေသရှိ အစ္စရေးပိုင်နက် နေရာသုံးခုကို အောက်တိုဘာ ၈ ရက် နံနက်ပိုင်းက ရော့ကဒ်ဒုံးကျည်ပေါင်း ဒါဇင်ချီနဲ့ ပစ်ခတ်တိုက်ခိုက်ခဲ့ကြောင်း သိရပါတယ်။

ဟစ်ဘိုလာစစ်သွေးကြွအုပ်စုကလည်း ၎င်းတို့ဟာ ပါလက်စတိုင်းပြည်သူတွေနဲ့ စုစည်းညီညွှတ်ကြောင်းပြသဖို့အတွက် အစ္စရေးသိမ်းပိုက်ထားတဲ့ Shebaa ဒေသကို ရော့ကဒ်၊ အမြှောက်တွေနဲ့ ပစ်ခတ်တိုက်ခိုက်ခဲ့ကြောင်း ဝန်ခံပြောဆိုထားပါတယ်။

ဟစ်ဘိုလာစစ်သွေးကြွအုပ်စုက အစ္စရေးတို့ တိုက်ခိုက်သိမ်းပိုက်ထားတဲ့ Shebaa အ ရပ်ဒေသရှိ ရေဒါစခန်းနေရာတွေ အပါအဝင် နေရာသုံးကို ပစ်မှတ်ထားတိုက်ခိုက်ခဲ့ကြောင်း၊ ပြောပါတယ်။

အဆိုပါအရပ်ဒေသဟာ ယခင်က လက်ဘနွန်ပိုင်နက်ဖြစ်ခဲ့ပေမယ့် အစ္စရေးတို့ တိုက်ခိုက်သိမ်းပိုက်ခံထားရတဲ့ နယ်မြေဖြစ်နေကြောင်း သိရပါတယ်။