Pika (NSS) - အောက်တိုဘာ ၅ 

ပြီးခဲ့သည့်ရက်ပိုင်းက တူရကီနိုင်ငံ အန်ကာရာမြို့တွင် ဖြစ်ပွားခဲ့သော အသေခံဗုံးခွဲတိုက်ခိုက်မှုအတွင်း သေဆုံးသွားခဲ့သော ကာဒစ်အကြမ်းဖက်အဖွဲ့ဝင်ဟုယူဆရသူနှစ်ဦးမှာ ဆီးရီးယားနိုင်ငံတွင် လေ့ကျင့်သင်ကြားမှုများကို လုပ်ဆောင်ခဲ့ပုံပေါ်ကြောင်း တူရကီအစိုးရက ပြောကြားခဲ့သည်။

အောက်တိုဘာလ(၁)ရက်က ဖြစ်ပွားခဲ့သော အသေခံဗုံးခွဲတိုက်ခိုက်မှုကို လက်တုံ့ပြန်သည့်အနေဖြင့် ဆီးရီးယား နှင့် အီရတ်ရှိ ကာဒစ်အကြမ်းဖက်အဖွဲ့၏ နေရာများကို ပြန်လည်တိုက်ခိုက်ပိုင်ခွင့်ရှိကြောင်း တူရကီနိုင်ငံခြားရေးဝန်ကြီး Hakan Fidan က ပြောကြားခဲ့သည်။

ပြည်ထဲရေးဝန်ကြီးဌာန ရုံးချုပ်အပြင်ဖက်တွင် ဖြစ်ပွားခဲ့သော အသေခံဗုံးခွဲတိုက်ခိုက်မှုအတွင်း တစ်ဦးမှာ ရဲတပ်ဖွဲ့၏ ပစ်သတ်ခြင်းကိုခံခဲ့ရပြီး အခြားတစ်ဦးမှာ ဗုံးပေါက်ကွဲမှုအတွင်း သေဆုံးသွားကြောင်း တူရီကရဲတပ်ဖွဲ့က ပြောကြားခဲ့သည်။ 

အဆိုပါဖြစ်ရပ်အတွင်း ရဲတပ်ဖွဲ့ဝင်နှစ်ဦး ထိခိုက်ဒဏ်ရာရရှိခဲ့ကြောင်း သိရသည်။ Hakan Fidan က "ရဲတပ်ဖွဲ့ရဲ့ စုံစမ်းစစ်ဆေးမှုအရ အဲဒီအကြမ်းဖက်နှစ်ဦးဟာ ဆီးရီးယားက လာတာဖြစ်ပြီး  ဆီးရီးယားမှာပဲ လေ့ကျင့် သင်ကြား ခဲ့ပုံ ပေါ်ပါတယ်။ ဒီအချိန်ကနေစပြီး ဆီးရီးယားနဲ့ အီရတ်မှာရှိတဲ့ ကာဒစ်လက်ကိုင်အဖွဲ့ရဲ့ အခြေခံအဆောက်အဦး တွေ၊ ကြီးမားတဲ့အဆောက်အဦးတွေနဲ့ စွမ်းအင်အဆောက်အဦးတွေအားလုံးက ကျွန်တော်တို့ ပစ်မှတ်ပဲ ဖြစ်ပါတယ်" ဟု ပြောခဲ့သည်။

သို့သော်လည်း အန်ကာရာမြို့တွင်ဖြစ်ပွားခဲ့သော အသေခံဗုံးခွဲတိုက်ခိုက်မှုနှင့်ပတ်သက်ပြီး ၎င်းတို့တွင် တာဝန်မရှိကြောင်း ကာဒစ်လက်နက်ကိုင်အဖွဲ့က ပြောခဲ့သည်။