NSS - အောက်တိုဘာ ၂

တရုတ်-မြန်မာနှစ်နိုင်ငံနယ်စပ် မူဆယ်-ရွှေလီနယ်စပ်ဖြတ်သန်းသွားလာရေးဂိတ်များတွင် တရားဝင်ဗီဇာဖြင့် စတင်ဝင်ထွက်သွားလာနိုင်ပြီ ဖြစ်ကြောင်း နစကမှ သတင်းထုတ်ပြန်ထားသည်။

နစကမှ ယမန်နေ့ (အောက်တိုဘာလ ၁ ရက်)တွင် အထက်ပါကဲ့သို့ သတင်းထုတ်ပြန်ကြေ ညာခဲ့ခြင်းဖြစ်သည်။

ရှမ်းပြည်နယ်(မြောင်ပိုင်း) မူဆယ်မြို့ရှိ မြန်မာ-တရုတ် နှစ်နိုင်ငံနယ်စပ်ဖြတ်သန်းသွားလာရေးဂိတ်များတွင် တရားဝင်ဗီဇာ(Business Visa)ဖြင့် မူဆယ်-ရွှေလီ နယ်စပ်ဖြတ်သန်းသွားလာရေးဂိတ်ဖြစ်သော နန်းတော်ဂိတ်မှ စတင်ဝင်ထွက်သွားလာနိုင်ပြီဖြစ်ကြောင်း သိရသည်။

အဆိုပါ နန်းတော်ဂိတ်တွင် Foreigner Departure နှင့် Foreigner Arrival တို့အပြင် ဧည့်သည်နိုင်ငံခြားသားများ မြန်မာနိုင်ငံအတွင်းသို့ ဝင်ရောက်လာလျှင် စစ်ဆေးဆောင်ရွက်မှုများဆောင်ရွက်ရန် ကြိုတင်ပြင်ဆင်ဆောင်ရွက်ထားရှိလျက်ရှိကြောင်းလည်း ထုတ်ပြန်ချက်များအရ သိရသည်။

အဆိုပါ နန်းတော်ဂိတ်မှတဆင့် ဝင်ရောက်လိုသူများသည် ရန်ကုန်ရှိ တရုတ်ပြည်သူ့သမ္မတနိုင်ငံ သံရုံး (သို့မဟုတ်) မန္တလေးမြို့ရှိ တရုတ်ပြည်သူ့သမ္မတနိုင်ငံ ကောင်စစ်ဝန်ရုံးတို့၌ စီးပွားရေးမြန်မာနိုင်ငံကူးလက်မှတ် (BP – Passport for Business) စာအုပ်ဖြင့် Business Visa လျှောက်ထားရမည်ဖြစ်ကြောင်း သိရသည်။

လျှောက်ထားရာတွင်လည်း နယ်စပ်ဂိတ်ပေါက်မှ ဖြတ်သန်းမည်ဖြစ်ကြောင်းလည်း တစ်ပါတည်းလျှောက်ထားရမည်ဖြစ်ကြောင်း သိရသည်။

မြန်မာတရုတ်နယ်စပ် နန်းတော်ဂိတ်၌ တရားဝင်ဗီဇာဖြင့် ဖြတ်သန်းသွာလာခွင့်ကို မူဆယ်ခရိုင်စီမံအုပ်ချုပ်ရေးအဖွဲ့ဥက္ကဋ္ဌ ဦးအောင်ဇော်မိုး နှင့် ရွှေလီမြို့တော်ဝန် Mr. Shang La Sian တို့က ဖွင့်လှစ်ပေးခဲ့ခြင်းဖြစ်ကြောင်း သိရသည်။

မြန်မာ-တရုတ်နှစ်နိုင်ငံရှိ နိုင်ငံသားများကို နိုင်ငံကူးလက်မှတ်ဖြင့် နယ်စပ်ဂိတ်ဖြတ်သန်းခွင့်များကိုပေးသွားရန်ရှိကြောင်း လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည် ထောင်စုဝန်ကြီး ဦးမြင့်ကြိုင်က စက်တင်ဘာလအတွင်းက ပြောကြားခဲ့ဖူးသည်။