ရောင်နီ (NSS) - စက်တင်ဘာ ၂၃

         စားနပ်ရိက္ခာ သယ်ယူပို့ဆောင်ရေး ကုမ္ပဏီဖြစ်တဲ့ foodpanda ဟာ ပြီးခဲ့တဲ့နှစ်က ဝန်ထမ်းအင်အားလျော့ချမှု နှစ်ကြိမ်ထက်မနည်းရှိခဲ့ပေမယ့် လုပ်ငန်းလည်ပတ်မှု ချောမွေ့စေရေးအတွက် ဖိအားနဲ့ ရင်ဆိုင်နေရဆဲဖြစ်တာကြောင့် သောကြာနေ့(စက်တင်ဘာလ ၂၂ ရက်) မှာ အာရှ-ပစိဖိတ်ရဲ့ ဝန်ထမ်းအင်အားကို ထပ်မံလျော့ချခဲ့ပြန်ပါတယ်။ 

အရေအတွက် ဘယ်လောက်ထိ လျှော့ချခဲ့တယ်ဆိုတာကိုတော့ မသိရသေးပါဘူး။ ကုမ္ပဏီဟာ ပြီးခဲ့တဲ့ ၂၀၂၂ ခုနှစ် စက်တင်ဘာလနဲ့ ၂၀၂၃  ခုနှစ် ဖေဖော်ဝါရီလမှာ ဝန်ထမ်းအင်အားကို လျော့ချခဲ့ဖူးပါတယ်။ ဝန်ထမ်းတစ်ဦးစီရဲ့ဝန်ဆောင်မှုကြာချိန်ပေါ်မူတည်ပြီး (သို့မဟုတ်) နိုင်ငံတွေမှာ ပြဋ္ဌာန်းထားတဲ့ လမ်းညွှန်ချက်တွေနဲ့အညီ (သို့မဟုတ်) အဲဒီအချက် နှစ်ခုလုံးနဲ့ ကိုက်ညီတဲ့ ဝန်ထမ်းတွေကို လစာအပြည့်ခံစားခွင့်နဲ့ အလုပ်ထုတ်ခဲ့တယ်လို့ သိရပါတယ်။

          Foodpanda ရဲ့ မိခင်ကုမ္ပဏီ ဘာလင်ရုံးချုပ် Delivery Hero က ၎င်းရဲ့ foodpanda လုပ်ငန်းကို စင်ကာပူ၊ ကမ္ဘောဒီးယား၊ လာအို၊ မလေးရှား၊ ဖိလစ်ပိုင်နဲ့ ထိုင်းနိုင်ငံတွေမှာ ရုံးတွေ ဖွင့်လှစ်ထားပါတယ်။ ကုမ္ပဏီဟာ အမြတ်အစွန်းအတွက် တွန်းအားပေးတဲ့ အနေနဲ့ ဒေသတွင်း ရင်းနှီးမြှုပ်နှံမှုတွေကို ချဲ့ထွင်ဖို့ အလားအလာရှိပေမယ့် ၂၀၂၃ ခုနှစ် ဒုတိယသုံးလပတ်မှာပဲ အာရှမှာလုပ်ငန်းရဲ့ ဝင်ငွေဝေစုဟာ အရင်နှစ်ကထက် ကျဆင်းလာခြင်းနဲ့ ရင်ဆိုင်ခဲ့ရပါတယ်။ ဒါကြောင့် foodpanda ဟာ ပိုမိုရှင်းလင်းပြတ်သားတဲ့ ဆုံးဖြတ်ချက်တွေ ချနိုင်ဖို့အတွက် ဒေသတွင်းနဲ့ နိုင်ငံဆိုင်ရာ အဖွဲ့တွေနဲ့အတူ ၎င်းရဲ့ အဖွဲ့အစည်း ဖွဲ့စည်း ပုံကို ဂရုတစိုက်ပြန်လည် သုံးသပ်နေတယ်လို့ ဆိုပါတယ်။