ယွန်း(NSS) - စက်တင်ဘာ ၂၁

ယခုလ(စက်တင်ဘာလ)အတွင်း ရေကြီးရေလျှံမှုကြောင့် စစ်ကိုင်းတိုင်း၊ ကလေးမြို့ရှိ ရပ်ကွက်အချို့မှ ဒေသခံ (၁၀၀၀)ခန့် ဘေးလွတ်ရာရွေ့ပြောင်းခဲ့ရကြောင်း သိရသည်။

UNOCHA MYANMAR မှ စက်တင်ဘာလ(၂၀)ရက်တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

နိုင်ငံအနောက်မြောက်ပိုင်း နှင့် အ‌‌‌ရှေ့တောင်ပိုင်းများတွင် လက်နက်ကိုင်ပဋိပက္ခများ ဆက်လက်ဖြစ်ပွားလျက်ရှိပြီး အိုးအိမ်စွန့်ခွာထွက်ပြေးရသူများနှင့်အတူ အရပ်သားထိခိုက်သေဆုံးမှုများလည်း ဆက်လက်ရှိနေကြောင်း သိရသည်။

ထို့ပြင် ကုလသမဂ္ဂ၏နောက်ဆုံးကိန်းဂဏန်းများအရ မြန်မာနိုင်ငံတစ်ဝန်း၌ ပြည်တွင်းနေရပ်စွန့်ခွာသူဦးရေ (၁ ဒသမ ၉)သန်းကျော်ရှိကြောင်း UNOCHA မှ ထုတ်ပြန်ထားသည်။

မိုးသည်းထန်စွာရွာသွန်း၍ ရေကြီးရေလျှံမှုများများလည်း ဆက်လက်ဖြစ်ပေါ်နေပြီး နေရပ်စွန့်ခွာသူများ၏ နေထိုင်ရေးကိုပိုမိုဆိုးရွာစေကာ စစ်ကိုင်းတိုင်း၊ ကလေးမြို့တွင် ပြီးခဲ့သည့် စက်တင်ဘာလ(၈)ရက်တွင် ရေကြီးရေလျှံမှုကြောင့် ရပ်ကွက်(၆)ခုရှိ လူ(၁၀၀၀)ခန့်ကို ဘေးကင်းရာသို့ ရွှေ့ပြောင်းခဲ့ရကြောင်း UNOCHA မှ ထုတ်ပြန်ထားသည်။

အလားတူ နိုင်ငံ၏အရှေ့တောင်ပိုင်းတွင် ဩဂုတ်လအတွင်း ရေဘေးသင့်ပြည်သူ (၈၀,၀၀၀) ကျော်ရှိခဲ့ပြီး အချို့ရေ ဘေးသင့်ပြည်သူများသည် နေအိမ်သို့ပြန်နိုင်ခဲ့သော်လည်း အများအပြားသည် ရွှေ့ပြောင်းနေထိုင်နေရဆဲဖြစ်ကာ အရေးပေါ်အကူအညီများ လိုအပ်နေကြောင်း သိရသည်။

ထို့ပြင် ကချင်ပြည်နယ်နှင့် နိုင်ငံ၏အရှေ့တောင်ပိုင်းများတွင် ကန့်သတ်ချက်များတိုးလာခြင်းကြောင့် အကူအညီလိုအပ်သူများအား အရေးပါသည့်အကူအညီများပေးနိုင်ရန် အဟန့်အတားဖြစ်နေကြောင်း UNOCHA မှ အသိပေးထားသည်။

၂၀၂၃ ခုနှစ်အတွင်း လူဦးရေ(၅)သန်းကို လူသားချင်းစာနာမှုအကူအညီပေးရန်ဦးတည်ခဲ့ရာ ပထမနှစ်ဝက်အတွင်း (၁ ဒသမ ၈)သန်းကျော်ကို အကူအညီပေးခဲ့ပြီးဖြစ်ကြောင်း သိရသည်။