ယွန်း (NSS) - စက်တင်ဘာ ၂၁

ရန်ကုန် အပါအဝင် တိုင်းနှင့် ပြည်နယ်များတွင် စက်တင်ဘာလကုန်အထိ မိုးထစ်ချုန်းရွာသွန်းနိုင်ကြောင်း မိုးဇလမှ ခန့်မှန်းထားသည်။

မိုးလေဝသ နှင့် ဇလဗေဒညွှန်ကြားမှုဦးစီးဌာနမှ ယနေ့(စက်တင်ဘာလ ၂၁ ရက်)တွင် ထုတ်ပြန်သည့် စက်တင်ဘာ တတိယ(၁၀)ရက်ပတ်အတွက် မိုးလေဝသခန့်မှန်းချက်တွင် အထက်ပါကဲ့သို့ ခန့်မှန်းထားခြင်းဖြစ်သည်။

ဘင်္ဂလားပင်လယ်အော်တွင် လေဖိအားနည်းရပ်ဝန်း (၁)ကြိမ်ဖြစ်ပေါ်နိုင်ပြီး အားကောင်းလာကာ မုန်တိုင်းငယ်အဖြစ်သို့ ရောက်ရှိနိုင်ကြောင်း ထုတ်ပြန်ချက်တွင် ဖော်ပြထားသည်။

အနောက်တောင်မုတ်သုံလေသည် စက်တင်ဘာလ (၂၂)ရက်မှ (၂၇) ရက်အတွင်း မြန်မာနိုင်ငံအလယ်ပိုင်းဒေသများမှလည်းကောင်း၊ စက်တင်ဘာလ (၂၈) ရက်မှ အောက်တိုဘာလ(၃)ရက်အတွင်း မြန်မာနိုင်ငံမြစ်ဝကျွန်းပေါ် ဒေသများမှလည်းကောင်း ဆုတ်ခွာသွားနိုင်ကြောင်း မိုးဇလမှ အသိပေးထားသည်။

အဆိုပါကာလအတွင်း မိုးရွာသွန်းမှုအခြေအနေသည် စစ်ကိုင်းနှင့် မန္တလေးတို့တွင် ရွာသွန်းမြဲထက်ပိုနိုင်ပြီး နေပြည် တော်၊ မကွေး၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ကချင်၊ ရှမ်း၊ ချင်း၊ ကယား၊ ကရင်နှင့် မွန်တို့တွင် ရွာသွန်းမြဲခန့် မိုးထစ်ချုန်းရွာနိုင်ကြောင်း သိရသည်။

ထိုသို့ ရွာသွန်းရာတွင် စစ်ကိုင်းအထက်ပိုင်း၊ ပဲခူး၊ ရန်ကုန်၊ ဧရာဝတီ၊ တနင်္သာရီ၊ ကချင်၊ ချင်း၊ ကရင် နှင့် မွန်တို့တွင် (၇)ရက်မှ (၉)ရက်ခန့် ရွာသွန်းနိုင်ကြောင်း မိုးဇလမှ ခန့်မှန်းထားသည်။

ထို့ပြင် နေပြည်တော်၊ စစ်ကိုင်း၊ မန္တလေး၊ မကွေး၊ ရှမ်း၊ ရခိုင်နှင့် ကယားတို့၌ (၄)ရက်မှ (၆)ရက်ခန့် မိုးထစ်ချုန်းရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ ထုတ်ပြန်ထားသည်။