ယွန်း (NSS)- စက်တင်ဘာ ၁၉

ကိုရီးယားနိုင်ငံ၌ တရားမဝင်နေထိုင်သည့် နိုင်ငံခြားသားများအား ဒီဇင်ဘာလကုန်မတိုင်မီ ထွက်ခွာပါက ဒဏ်ကြေးကင်းလွတ်ခွင့်ပြုမည်ဖြစ်ကြောင်းသိရသည်။ 

အဆိုပါ နိုင်ငံခြားသားများတွင် မြန်မာနိုင်ငံသားများလည်းပါဝင်သည့်အတွက် ကိုရီးယားနိုင်ငံ၊ တရားရေးဝန်ကြီးဌာနမှ ဆိုးလ်မြို့ရှိ မြန်မာသံရုံးသို့ အကြောင်းကြားလာကြောင်း မြန်မာသံရုံးက ယနေ့(စက်တင်ဘာလ ၁၉ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ကိုရီးယားနိုင်ငံ၌ တရားမဝင်နေထိုင်နေသည့် နိုင်ငံခြားသားများအနေဖြင့် စက်တင်ဘာလ(၁၁)ရက်မှ ဒီဇင်ဘာလ (၃၁)ရက်အတွင်း မိမိဆန္ဒအလျောက် ထွက်ခွာမည်ဆိုပါက ဒဏ်ကြေးကင်းလွတ်ခွင့်အပြင် ပြည်ဝင်ခွင့် ကန့်သတ် ချက်များလည်း ဆိုင်းငံ့ထားမည်ဖြစ်ကြောင်း ကိုရီးယားနိုင်ငံ၊ တရားရေးဝန်ကြီးဌာနမှ မြန်မာသံရုံး၊ ဆိုးလ်မြို့သို့ အကြောင်းကြားလာကြောင်း ထုတ်ပြန်ချက်အရ သိရသည်။

အဆိုပါ အကြောင်းကြားချက်တွင် ဒီဇင်ဘာလ(၃၁)ရက်မတိုင်မီ ထွက်ခွါမည်ဆိုပါက ကြိုတင်သတင်းပို့စနစ်အရ နိုင်ငံကူးလက်မှတ်၊ မိမိဆန္ဒအလျောက်ထွက်ခွါမည့် အကြောင်းကြားစာ၊ လေယာဥ်လက်မှတ်အစရှိသည့် စာရွက် စာတမ်းများဖြင့် လူဝင်မှုကြီးကြပ်ရေးဌာနသို့ ကိုယ်တိုင်ဖြစ်စေ၊ အွန်လိုင်းဖြင့်ဖြစ်စေ လျှောက်ထားရမည်ဖြစ်ကြောင်း ထုတ်ပြန်ထားသည်။

ထိုသို့ လျှောက်ထားပြီး လေဆိပ်မှတစ်ဆင့် နေ့ချင်းထွက်ခွာမည်ဆိုပါက ဒဏ်ကြေးကင်းလွတ်ခွင့်နှင့် ပြည်ဝင်ခွင့်ကန့်သတ်ချက်ဆိုင်းငံ့ခြင်းအားခံယူပြီး နိုင်ငံအတွင်းမှ ထွက်ခွာနိုင်ကြောင်း သံရုံးမှ အသိပေးထားသည်။

သို့သော် အဆိုပါစနစ်စတင်သက်ရောက်သည့် စက်တင်ဘာလ(၁၁)ရက်နောက်ပိုင်း တရားမဝင်နေထိုင်သည့် နိုင်ငံ ခြားသားနှင့် ခိုးဝင်နေထိုင်သူ၊ နိုင်ငံကူးလက်မှတ်အတုပြုလုပ်ထားသူ၊ ပြစ်မှုကျူးလွန်ထားသူ၊ ထွက်ခွါမိန့်အား လိုက်နာရန်ပျက်ကွက်ထားသူများ မပါဝင်ကြောင်း သိရသည်။