သန့်ဇင် (NSS) - စက်တင်ဘာ ၁၅

မန္တလေးတိုင်း၊ မဟာအောင်မြေခရိုင်တရာရုံးက အသက်(၁၅)နှစ်နှင့် (၁၈)နှစ်အရွယ်အမျိုးသမီးငယ်များကို အဓမ္မပြည့်တန်ဆာအဖြစ် ပို့ဆောင်၍ ငွေကြေးအကျိုးအမြတ် ခေါင်းပုံဖြတ်ခဲ့သူများကို လူကုန်ကူးမှုဖြင့် ထောင်ဒဏ်တစ်သက်နှင့် ပြစ်ဒဏ်များ အသီးသီး ချမှတ်ခဲ့ကြောင်း သိရသည်။

မဟာအောင်မြေခရိုင်တရားရုံးက စင်တင်ဘာလ ၈ ရက်က အထက်ပါကဲ့သို့ အမိန့်ချမှတ်ခဲ့ကြောင်း နစက၏ သတင်းထုတ်ပြန်ချက်များအရ သိရသည်။

မဟာအောင်မြေမြို့နယ်တွင်နေထိုင်သူ ကမာဘိုင်(ခ)ကျော်လေး(ခ)ကျော်ကျော် နှင့် ထားထားမြင့်(ခ)မထက်၊ ချမ်းမြသာစည်မြို့နယ်နေ စောမြတ်သူ(ခ) မြတ်သူနှင့် အေးချမ်းမိုး(ခ)စုစုတို့(၄)ဦးက ရန်ကုန်တိုင်း၊ ထန်းတပင်မြို့နယ်နေ အသက်(၁၅)နှစ်နှင့် (၁၈)နှစ်အရွယ် အမျိုးသမီးငယ်(၂)ဦးအား အဓမ္မပြည့်တန်ဆာအဖြစ် ခိုင်းစေရန် ပို့ဆောင်၍ ငွေကြေးအကျိုးအမြတ်များကို ခေါင်းပုံဖြတ်ခဲ့ကြောင်း သိရသည်။

ထို့ကြောင့် ၎င်းတို့(၄)ဦးအား အောင်ပင်လယ်နယ်မြေရဲစခန်းက(ပ)၂ဝ/၂ဝ၂၃အရ လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၅/၄၄ဖြင့် အမှုဖွင့်အရေးယူခဲ့ကြောင်း သိရသည်။

ဆက်လက်၍ ၎င်းတို့အား မဟာအောင်မြေခရိုင်တရားရုံးသို့တရားစွဲတင်ပို့ခဲ့ပြီး ကမာခိုင်(ခ)ကျော်လေး(ခ)ကျော်ကျော်နှင့် ထားထားမြင့်(ခ)မထက်တို့ကို လူကုန်ကူမှုတားဆီးနှိမ်နင်းရေး ဥပဒေပုဒ်မ ၃၈(က)/၄၀အရ ထောင်ဒဏ်တစ်သတ်စီချမှတ်ခဲ့ကြောင်း သိရသည်။

ထို့နောက် စောမြတ်သူ(ခ)မြတ်သူနှင့် အေးချမ်းမိုး(ခ)စုစုတို့နှစ်ဦးကို လူကုန်ကူးမှုတားဆီးနှိမ်နင်းရေးဥပဒေပုဒ်မ ၃၈(က)အရ ထောင်ဒဏ် နှစ်(၂ဝ)စီ ကျခံစေခဲ့ကြောင်း နစက၏ သတင်းထုတ်ပြန်ချက်များအရ သိရသည်။

အလားတူ ကရင်ပြည်နယ်၊ ဘားအံမြို့နယ်နေ မိုးမိုးအောင်(ခ)ဂျူလိုင်မိုးက အဆိုပါမြို့နယ်မှ အသက် (၁၈)နှစ်နှင့် (၁၇)နှစ်အရွယ် အမျိုးသမီး(၂)ဦးအား တရုတ်နယ်စပ်ရှိ အလှပြင်ဆိုင်တွင် အလုပ်လုပ်ပါက တစ်လလျှင် (၁၅)သိန်း ရရှိမည်ဟုဆိုကာ ပြည့်တန်ဆာအဖြစ် ခိုင်းစေပြီး ငွေကြေးအမြတ်ထုတ် ခေါင်းပုံဖြတ်ခဲ့ကြောင်း သိရသည်။

ထို့ကြောင့် ၎င်းအား ဘားအံမြို့မရဲစခန်းက (ပ)၄၅/၂ဝ၂၃၊ လူကုန်ကူးမှု တားဆီးနှိမ်နင်းရေးဥပဒေပုဒ်မ ၃၅ ဖြင့် အမှုဖွင့်အရေးယူခဲ့ကြောင်း သိရသည်။

ထို့နောက် စက်တင်ဘာလ ၁၃ ရက်တွင် မိုးမိုးအောင်(ခ)ဂျူလိုင်မိုးအား ဘားအံခရိုင်တရားရုံးမှ လူကုန်ကူးမှုတားဆီးနှိမ်နင်းရေး ဥပဒေပုဒ်မ ၃၅ အရ အလုပ်နှင့်ထောင်ဒဏ် ၁ဝ နှစ်ချမှတ်ခဲ့ကြောင်း နစက၏ သတင်းထုတ်ပြန်ချက်များအရ သိရသည်။