Pearl (NSS) - စက်တင်ဘာ ၁၁

ရန်ကုန်-မန္တလေးအမြန်လမ်းမကြီး၌ Hijet ကားတစ်စီးတိမ်းမှောက်ပြီး အမျိုးသမီးတစ်ဦးသေဆုံးကာ (၆)ဦးထက်မနည်း ထိခိုက်ဒဏ်ရာရရှိခဲ့ကြောင်း အမြန်လမ်းမီးသတ်တပ်ဖွဲ့ထံမှ သတင်းရရှိသည်။ 

ဖြစ်စဉ်မှာ ယနေ့ (စက်တင်ဘာလ ၁၁ ရက်)၊ နံနက် (၈)နာရီ(၄၀)မိနစ်အချိန်ခန့်တွင် ရန်ကုန်-မန္တလေးအမြန်လမ်းမကြီး၊  မိုင်တိုင်အမှတ်(၂၁၇/၀ နှင့် ၂၁၈/၁)ဖာလုံကြား၌ ဖြစ်ပွားခဲ့ကြောင်း သိရသည်။ 

ယာဉ်မောင်းအပါအဝင် အမျိုးသား(၄)ဦး နှင့် အမျိုးသမီး(၄)ဦး၊ စုစုပေါင်း (၈)ဦးလိုက်ပါလာသော HIJET အမျိုးအစား (အဖြူရောင်) ယာဉ်သည် မန္တလေးဘက်မှ နေပြည်တော်ဘက်သို့မောင်းနှင်လာစဉ် အခင်းဖြစ်နေရာသို့အရောက်၌ အရှိန်းမထိန်းနိုင်ဖြစ်ကာ တိမ်းမှောက်ပြီး လမ်းလယ်ကျွန်းပေါ်သို့ ရောက်ရှိသွားခဲ့ကြောင်း သိရသည်။ 

" Hijet ကား အရှိန်လွန်ပြီး မှောက်တာ။ (၇)ဦး ဒဏ်ရာရတာ။ (၁)ဦးက ဆေးရုံ‌ရောက်တော့ ဆုံးသွားတယ်" ဟု ပ‌လွေးအမြန်လမ်းမီးသတ်စခန်း၏တာဝန်ရှိသူတစ်ဦးက NSS ကိုပြောသည်။

ဖြစ်စဉ်ကြောင့် အမျိုးသမီးတစ်ဦး သေဆုံးသွားခဲ့ပြီး အမျိုးသား(၃)ဦး နှင့် အမျိုးသမီး(၃)ဦးတို့ ထိခိုက်ဒဏ်ရာရရှိခဲ့ကြောင်း သိရသည်။ 

လက်ရှိတွင် ၎င်းတို့အားနေပြည်တော်ကုတင်(၁၀၀၀)ဆေးရုံကြီးသို့ပို့ဆောင်ပေးထားပြီး ဒဏ်ရာရရှိသူများအနက် (၂)ဦးသည် စိုးရိမ်ဖွယ်ရာ အခြေအနေရှိကြောင်း သိရသည်။