Pika (NSS) - စက်တင်ဘာ ၁၁

ဘရာဇီးလ်သမ္မတလူလာဒီဆေးလ်ဗားသည် ကုလသမဂ္ဂလုံခြုံရေးကောင်စီ UNSC တွင် ပြုပြင်ပြောင်းလဲမှုများ လုပ်ဆောင်ရန် စက်တင်ဘာ(၁၁)ရက်က နယူးဒေလီမြို့တွင် ပြုလုပ်သော သတင်းစာရှင်းလင်းပွဲတစ်ခုအတွင်း တောင်းဆိုခဲ့ကြောင်း သိရသည်။

လက်ရှိ ကုလသမဂ္ဂလုံခြုံရေးကောင်စီ၏ ဖွဲ့စည်းပုံသည် ၁၉၄ဝ ခုနှစ်ခန့်က ကမ္ဘာကြီးကို ရောင်ပြန်ဟပ်နေကြောင်း ၎င်းက ထပ်မံပြောခဲ့သည်။ အိန္ဒိယအစိုးရသည် G20 ထိပ်သီးအစည်းအဝေးပြီးဆုံးသည့်နေ့ စက်တင်ဘာလ(၁ဝ) ရက်တွင် G20 ဥက္ကဋ္ဌရာထူးကို ဘရာဇီးလ်အစိုးရကို လွှဲပြောင်းပေးခဲ့ကြောင်း သိရသည်။

ဘရာဇီးလ်၊ အိန္ဒိယ၊ ဂျပန် နှင့် ဂျာမနီတို့သည် ကုလသမဂ္ဂလုံခြုံရေးကောင်စီတွင် အမြဲတမ်းအဖွဲ့ဝင်နိုင်ငံဖြစ်ခွင့် ရရန်အတွက် တောင်းဆိုမှုများကို အပြန်အလှန်ထောက်ခံနေသည့် G4 အဖွဲ့ဝင် နိုင်ငံများဖြစ်ကြောင်း သိရသည်။ ထို့အပြင် ဘရာဇီးလ်သမ္မတလူလာဒီဆေးလ်ဗား နှင့် အိန္ဒိယဝန်ကြီးချုပ်မိုဒီတို့သည်  G20 ထိပ်သီးအစည်းအဝေး ခန်းဘေးတွင် တွေ့ဆုံခဲ့ကြပြီး ကုလသမဂ္ဂလုံခြုံရေးကောင်စီ၏ အမြဲတမ်းအဖွဲ့ဝင်နိုင်ငံ နှင့် အမြဲတမ်းမဟုတ်သော အဖွဲ့ဝင်နိုင်ငံများကို တိုးချဲ့ခြင်းများ အပါအဝင် UNSC ၏ ဖွဲ့စည်းပုံပြုပြင်ပြောင်းလဲရေးနှင့် ပတ်သက်သည့်  ၎င်းတို့ ၏ ကတိဝတ်များကို ထပ်မံအတည်ပြုခဲ့ကြကြောင်းလည်း သိရသည်။ 

အိန္ဒိယအစိုးရသည် G20 ဥက္ကဋ္ဌရာထူးကို ဘရာဇီးလ်အစိုးရကို တရားဝင်လွှဲပြောင်းပေးပြီးနောက် နာရီပိုင်းအကြာ တွင် မိုဒီနှင့် လူလာဒီဆေးလ်ဗားတို့ တွေ့ဆုံခဲ့ခြင်းဖြစ်ကြောင်း သိရသည်။ ထို့အပြင် နှစ်နိုင်ငံလုံးသည် ကုလသမဂ္ဂ  လုံခြုံရေးကောင်စီတွင် အမြဲတမ်းအဖွဲ့ဝင်နိုင်ငံဖြစ်လိုသည့် ၎င်းတို့၏ တောင်းဆိုမှုများကို အပြန်အလှန်ထောက်ခံ ကြောင်း မိုဒီ နှင့် လူလာဒီဆေးလ်ဗားတို့က ပြောကြားခဲ့သည်။

မိုဒီ နှင့် လူလာဒီဆေးလ်ဗားတို့သည် ကုလသမဂ္ဂလုံခြုံရေးကောင်စီပြုပြင်ပြောင်းလဲရေးနှင့်ပတ်သက်ပြီး ပုံမှန် တွေ့ဆုံညှိနှိုင်းရေး အစည်းအဝေးများ ပြုလုပ်ရန်လည်း သဘောတူညီခဲ့ကြကြောင်း သိရသည်။ 

ကုလသမဂ္ဂလုံခြုံရေးကောင်စီတွင် အဖွဲ့ဝင်နိုင်ငံ(၁၅)နိုင်ငံရှိပြီး အမြဲတမ်းအဖွဲ့ဝင်နိုင်ငံ(၅)နိုင်ငံရှိကာ အမြဲတမ်းအဖွဲ့ဝင်မဟုတ်သည့် အလှည့်ကျအဖွဲ့ဝင်(၁ဝ)နိုင်ငံရှိကြောင်း သိရသည်။