သန့်ဇင်(NSS) - စက်တင်ဘာ ၈

ဧရာဝတီတိုင်း၊ ဇလွန်မြို့ရှိ ဖောင်တော်ချိတ်ဘုရာအနီးတွင် ကလေးငယ်(၄)ဦးရေဆင်းကူးရာမှ ဧရာဝတီမြစ်အတွင်း ရေနစ်ပျောက်ဆုံးလျက်ရှိကြောင်း သိရသည်။

ဖြစ်စဉ်မှာ ယနေ့ (စက်တင်ဘာလ ၈ ရက်)၊ နံနက် ၉နာရီအချိန်တွင် ဇလွန်မြို့၊ ဆန်တန်းရပ်ကွက်၊ ဖောင်တော်ချိတ်ဘုရားအနီးတွင် ဖြစ်ပွားခဲ့ကြောင်း ဗြဟ္မစိုရ်လူမှုကူညီရေးအသင်းထံမှ သိရသည်။

“ဒီနေ့က ဥပုသ်နေ့ဆိုတော့ လူကြီးတွေဥပုသ်စောင့်နေတဲ့အချိန်မှာ ကလေးတွေက ဘုရားနားကနတ်လမ်းမှာ အင်္ကျီတွေချွတ်ပြီး ရေဆင်းကူးတာပါ။ အဲဒီနေရာက ဧရာဝတီမြစ်နဲ့အဆက်ပဲပြောပါတော့။ ကလေးတွေကရေတက်နေတဲ့အချိန် ရေဆင်းကူးနေတုန်းမှာနစ်တာပေါ့” ဟု ဗြဟ္မစိုရ်လူမှုကူညီရေးအသင်းမှ တာဝန်ရှိသူတစ်ဦးက NSS ကိုပြောသည်။

ရေနစ်ပျောက်ဆုံးနေသည့် ကလေးငယ်(၄)ဦးအနက်မှ အသက်(၁၃)နှစ်အရွယ် မိန်းကလေးတစ်ဦးအား သေဆုံးလျက် ပြန်လည်ရှာဖွေတွေ့ရှိခဲ့ပြီး ကျန်ကလေး(၃)ဦးသည် ပျောက်ဆုံးလျက်ရှိကြောင်း သိရသည်။

“ပြန်တွေ့တာက မိန်းကလေး။ နစ်တဲ့အထဲမှာတော့ အသက်အကြီးဆုံးပေါ့။ အသက်က (၁၃)နှစ်အရွယ်ပါ။ ကျန်တဲ့ကလေးတွေကိုတော့ မတွေ့သေးဘူး။ ရှာဖွေရေးတွေဆက်လုပ်နေတုန်းပါ” ဟု ၎င်းကဆက်လက်ပြောသည်။

ပျောက်ဆုံးနေသည့် ကလေးငယ်များသည် ဆန်တန်းရပ်ကွက်တွင်နေထိုင်သူများဖြစ်ပြီး  ရှာဖွေကယ်ဆယ်ရေးများ ဆက်လက်လုပ်ဆောင်လျက်ရှိကြောင်း သိရသည်။

ပြန်လည်ရှာဖွေတွေ့ရှိခဲ့သည့် ရေနစ်သေဆုံးသူ မိန်းကလေးအား ဇလွန်မြို့နယ်ပြည်သူ့ဆေးရုံမှတစ်ဆင့် သုသာန်သို့ကူညီပို့ဆောင်ပေးခဲ့ကြောင်း သိရသည်။