သန့်ဇင်(NSS) - စက်တင်ဘာ ၃

မန္တလေးတိုင်း၊ ချမ်းမြသာစည်မြို့နယ်တွင် အသက်(၆၀)အရွယ်ရှိ ဆိုင်ကယ်ပွဲစားတန်းဥက္ကဋ္ဌ သေနတ်ဖြင့်ပစ်ခတ် လုပ်ကြံခံခဲ့ရကြောင်း သိရသည်။

ဖြစ်စဉ်မှာ ယမန်နေ့ (စက်တင်ဘာလ ၂ရက်)၊ နံနက် ၇နာရီခွဲအချိန်တွင် ချမ်းမြသာစည်မြို့နယ်၊ ကန်သာယာရပ် ကွက်၊ ၅၉လမ်း၊ ၁၁၀လမ်းနှင့်၁၁၁လမ်းကြားတွင် ဖြစ်ပွားခဲ့ကြောင်း မြို့ခံပြည်သူတစ်ဦးထံမှ သိရသည်။

“ပစ်ခတ်ခံရတာတော့ ဆိုင်ကယ်ပွဲစားတန်းမှာဗျ။ ဦးလေးကြီးက ဆိုင်ကယ်ပွဲစားတန်းက ဝိုင်းမှာထိုင်နေတုန်း အမျိုးသာ(၂)ယောက်က ဆိုင်ကယ်နဲ့လာပစ်သွားတာပါ” ဟု မြို့ခံပြည်သူတစ်ဦးက NSS ကိုပြောသည်။

ထိုသို့ပစ်ခတ်ခံရမှုကြောင့် ဆိုင်ကယ်ပွဲစားတန်းဥက္ကဋ္ဌ ဦးမော်ကြီးသည် ကျည်ထိမှန်ဒဏ်ရာ(၃)ချက်ဖြင့် အခင်းဖြစ်ပွားရာနေရာ၌ သေဆုံးသွားခဲ့ပြီး အနီးနားရှိဈေးရောင်နေသည့် အသက်(၆၀)နှစ် ဝန်းကျင်အမျိုးသမီးတွင်လည်း ကျည်ထိမှန်ဒဏ်ရာတစ်ချက် ရရှိခဲ့ကြောင်း သိရသည်။

“အပစ်ခံရတဲ့ဦးလေးကြီးက ပွဲစားလို့တော့သိရတယ်ဗျ။ သူနဲ့အတူ ဘေးနားက ဈေးရောင်းနေတဲ့ အဒေါ်ကြီးပါပစ်ခံရတာပါ။ ဦးလေးကြီးကတော့ ကျည်မှန်တာ(၃)(၄)ချက်လောက်ရှိတယ်။ ရင်ဘတ်ရယ်။ ကျောဘက်ရယ်နဲ့။ နဖူးမှာကတစ်ချက်ပေါ့နော်။ အဖွားကတော့ ပေါင်ကို တစ်ချက်မှန်ပါတယ်” ဟု ၎င်းက ဆက်လက်ပြောသည်။

ပစ်ခက်မှုအတွင်း အခင်းဖြစ်ပွားရာနေရာ၌ သေဆုံးသွားခဲ့သည့် အမျိုးသားနှင့် ဒဏ်ရာရရှိခဲ့သည့် အမျိုးသမီးတစ်ဦးအား မန္တလေးမြို့ ပြည်သူ့ဆေးရုံကြီးသို့ပို့ဆောင်ထားပြီး ပစ်ခတ်မှုကျူးလွန်ခဲ့သည့် အမျိုးသား(၂)ဦးအား သက်ဆိုင်ရာက စုံစမ်းရှာဖွေလျက်ရှိကြောင်း သိရသည်။