သန့်ဇင်(NSS)- စက်တင်ဘာ ၃

ကချင်ပြည်နယ်၊ မြစ်ကြီးနားမြို့တွင် အမျိုသား(၂)ဦးမောင်းနှင်လာသည့် ဆိုင်ကယ်များပေါ်ရှိ ဆာအိတ်အတွင်းမှ ငွေကျပ် (၃၁၆၃ ဒသမ ၅)သိန်းတန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း သိရသည်။

မူးယစ်ဆေးဝါးတားဆီးနှိမ်နင်းရေးတပ်ဖွဲ့က ပြီးခဲ့သည့် စက်တင်ဘာလ ၁ ရက်၊ ညနေ ၄နာရီအချိန်တွင် မြစ်ကြီးနားမြို့၊ ယုဇနရပ်ကွက်၊ လင်းရောင်ခြည်လမ်းတွင် အထက်ပါကဲ့သို့ ဖမ်းဆီးရမိခဲ့ခြင်းဖြစ်သည်။

အဆိုပါ လမ်းပေါ်တွင် နော်မိုင်(ခ)အင်ခွန်နော်မောင်းနှင်လာသည်ဆိုင်ကယ်နှင့် ရဲဇော်ဖြိုး(ခ)ရဲဇော် မောင်းနှင်လာသည့် ဆိုင်ကယ်တို့အား မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းအရစစ်ဆေးရှာဖွေခဲ့ကြောင်း သိရသည်။

ထိုသို့ရှာဖွေခဲ့ရာ ၎င်းတို့(၂)ဦးမောင်းနှင်လာသည့် ဆိုင်ကယ်များ၏ ခွကြားတွင် ကိုယ်စီတင်ဆောင်လာသည့် ဆာလာအိတ်အတွင်းမှ ငွေကျပ်(၃၁၆၃ ဒသမ ၅)သိန်းတန်ဖိုးရှိ စိတ်ကြွရူးသွပ်ဆေးပြား (၂)သိန်းကျော်နှင့် လက်ကိုင်ဖုန်း ၃လုံးတို့အား သိမ်းဆည်းရမိခဲ့ကြောင်း သိရသည်။

ထို့ကြောင့် ၎င်းတို့(၂)ဦးအား မြစ်ကြီးနားနယ်မြေရဲစခန်းတွင် မူးယစ်ဆေးဝါးနှင့် စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရအမှုဖွင့်အရေးယူထားပြီးကွင်းဆက်များအား ဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှ သတင်းထုတ်ပြန်ထားသည်။