NSS -ဩဂုတ် ၃၁

မန္တလေးတိုင်း၊ မလှိုင်မြို့နယ်လျှပ်စစ်ရုံးရှိ မီတာစာရေးအမျိုးသား(၂)ဦးအား PDF အမည်ခံအကြမ်းဖက်တစ်ဦးက သေနတ်ဖြင့်လာရောက်ပစ်ခတ်မှုကြောင့် တစ်ဦးဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ပြီးခဲ့သော ဩဂုတ်လ ၂၈ ရက်၊ မွန်းလွဲ ၂နာရီအချိန်တွင် မလှိုင်မြို့နယ်လျှပ်စစ်ရုံးအတွင်း၌ အထက်ပါကဲ့သို့ ဖြစ်ပွားခဲ့ကြောင်း ရဲတပ်ဖွဲ့က သတင်းထုတ်ပြန်ထားသည်။

အဆိုပါလျှပ်စစ်ရုံးရှိ မီတာခကောက်ခံသည့် ကောင်တာအတွင်း၌ မီတာစာရေးများဖြစ်သည့် မောင်ကောင်းထက်ဟိန်း(၂၀)နှစ်နှင့် မောင်ထက်လင်းအောင်(၁၉)နှစ်တို့ (၂)ဦးသည် လျှပ်စစ်မီတာခများ ကောက်ခံနေစဉ် PDF အမည်ခံအမျိုးသားတစ်ဦးက ဆိုင်ကယ်တစ်စီးဖြင့်ရောက်ရှိလာပြီး “ထနောင်းကိုင်းရွာအား ဘာလို့မီးဖြတ်တာလဲ” ဟုဆိုကာ သေနတ်ဖြင့် (၃)ချက်ပစ်ခတ်၍ မြို့နယ်လျှပ်စစ်ရုံးရှေ့လမ်းကြားအတိုင်း မောင်းနှင်ထွက်ပြေးသွားခဲ့ကြောင်း သိရသည်။

ထိုသို့ သေနတ်ဖြင့် ပစ်ခတ်ခံရမှုကြောင့် မောင်ကောင်းထက်ဟိန်း၏ ဝဲလက်မောင်းတွင် ကျည်ဖောက်ဝင်ဒဏ်ရာ တစ်ချက်ရရှိခဲ့သဖြင့် မလှိုင်မြို့နယ်ပြည်သူ့ဆေးရုံ၌ ဆေးကုသမှုခံယူလျက်ရှိကြောင်း ရဲတပ်ဖွဲ့မှ ထုတ်ပြန်ထားသည်။

၎င်းပစ်ခတ်မှုတွင် ပါဝင်ပတ်သက်သူအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။