ဂျန်ဇက် (NSS) - ဩဂုတ် ၂၈

သြစတြေးလျနိုင်ငံမြောက်ပိုင်းရှိ ကျွန်းနားမှာ မရိန်းတပ်ဖွဲ့ (၂၃)ဦးကိုတင်ဆောင်လာတဲ့ လေယာဉ်တစ်စီးပျက်ကျခဲ့ရာ မရိန်းတပ်ဖွဲ့ဝင်(၃)ဦး သေဆုံးခဲ့ရကြောင်းသိရပါတယ်။ 

အမေရိကန်သမ္မတ ဂျိုးဘိုင်ဒန်က မရိန်းတပ်ဖွဲ့သုံးဦး သေဆုံးခဲ့ရခြင်းအပေါ် ဝမ်းနည်းစိတ်မကောင်းဖြစ်မိကြောင်း၊ ရုပ်အလောင်းများကို မိခင်နိုင်ငံကို ပြန်လည်သယ်ဆောင်သွားမှာဖြစ်ကြောင်း ပြောပါတယ်။ အမေရိကန်စစ်သားတွေတင်ဆောင်လာတဲ့ MV-22B Osprey အမျိုးအစားစစ်လေယာဉ်ဟာ Melville ကျွန်းနားမှာ သြဂုတ်လ ၂၇ ရက်က ပျက်ကျသွားခဲ့ကြောင်း၊ အဆိုပါမရိန်းတပ်ဖွဲ့ဝင်တွေဟာ စစ်ရေးလေ့ကျင့် ခန်းအစီအစဉ်မှာပါဝင်ခဲ့သူတွေဖြစ်ကြောင်း သိရပါတယ်။ 

အဆိုပါ စစ်လေယာဉ်ပျက်ကျမှုကြောင့် ဒဏ်ရာရသွားသူ (၈)ဦးကို Royal Darwin ဆေးရုံကိုပို့ဆောင်ကုသပေးနေပြီး ကျန်ရှိသူများကိုတော့ မိခင်တပ်ရင်းကို ပြန်လည်ပို့ဆောင်ပေးခဲ့ကြောင်းသိရပါတယ်။ သြစတြေးလျနိုင်ငံမှာ အမေရိကန်၊ သြစတြေးလျ၊ ဖိလစ်ပိုင်၊ အရှေ့တီမောနဲ့ အင်ဒိုနီးရှားနိုင်ငံရဲ့စစ်သားတွေ အပါအဝင် စစ်သားပေါင်း (၂၅၀၀)ကျော်ပါဝင်တဲ့ "Exercise Predators Run 2023" အမည်ရှိစစ်ရေးလေ့ကျင့်ခန်းကို ပူးတွဲလုပ်ဆောင်နေခဲ့ကြောင်းသိရပါတယ်။ 

အမေရိကန်စစ်တပ်နဲ့ သြစတြေးလျစစ်တပ်တို့ဟာ သေဆုံးခဲ့တဲ့ အမေရိကန်မရိန်းတပ်ဖွဲ့ဝင် သုံးဦးရဲ့ရုပ်အလောင်းကို ပြန်လည်ရှာဖွေပြီး အမေရိကန်နိုင်ငံရှိ မိသားစုထံ ပို့ဖို့စီစဉ်နေကြောင်း သိရပါတယ်။ စစ်လေယာဉ်ပျက်ကျရတဲ့အသေးစိတ်အကြောင်းအရင်းကို အမေရိကန်စစ်ဘက်က သတင်းထုတ်ပြန်ခြင်းမျိုးမရှိသေးဘဲ စုံစမ်းစစ်ဆေးမှုတွေကို အနည်းဆုံး ၁၀ ရက်ကြာလုပ်ဆောင်သွားမယ်လို့ သတင်းထုတ်ပြန်ထားပါတယ်။