NSS - သြဂုတ် ၂၁

မကွေးတိုင်း၊ ငဖဲမြို့နယ်၊ တရုတ်-မြန်မာသဘာဝဓါတ်ငွေ့ပိုက်လိုင်းအနီးရှိ လုံခြုံရေးစခန်း ပစ်ခတ်တိုက်ခိုက်ခံခဲ့ရကြောင်း သတင်းရရှိသည်။

ယမန်နေ့(သြဂုတ် ၂ဝ ရက်) နံနက် ၅ နာရီ ၃ဝ မိနစ်အချိန်တွင် မင်းဘူး-အမ်းလမ်းမဘေး၊ ငဖဲမြို့နယ်၊ မြေလတ်ကျေးရွာအနီး၊ တရုတ်-မြန်မာသဘာဝဓါတ်ငွေ့ပိုက်လိုင်း station ရှိ လုံခြုံအဖွဲ့ဝင်များရှိရာစခန်းမှာ တိုက်ခိုက်ခံခဲ့ရခြင်းဖြစ်သည်။

“သဘာဝဓါတ်ငွေ့ပိုက်လိုင်း station ရှိတာပေါ့။ အဲဒီမှာ လုံခြုံရေးဆောင်ရွက်နေတဲ့အဖွဲ့ဝင်တွေကို မနက်ပိုင်းမှာ လက်နက်အဖွဲ့တစ်ခုက ဝင်ရောက်စီးနင်းတိုက်ခိုက်တာပေါ့။ ဒါပေမယ့် စခန်းကို မရလိုက်ပါဘူး။ ပြန်လည်ခုခံတဲ့အချိန်မှာ တစ်ဖက်က နောက်ဆုတ်ပြေးသွားတယ်။ အရာခံဗိုလ်ရယ်၊ ရဲဘော်တစ်ယောက်ရယ်တော့ ကျသွားတယ်” ဟု လုံခြုံရေးအဖွဲ့နှင့်နီးစပ်သော သတင်းအရင်းအမြစ်က NP News ကို ပြောသည်။

သဘာဝဓါတ်ငွေ့ပိုက်လိုင်းအနီးရှိ လုံခြုံရေးစခန်းကို လူအင်အား(၂ဝ)ခန့်ရှိသော လက်နက်ကိုင်အဖွဲ့တစ်ခုက လာရောက်တိုက်ခိုက်ခဲ့ခြင်းဖြစ်ကြောင်း ၎င်းက ဆက်လက်ပြောသည်။

ထိုသို့ တိုက်ခိုက်ခံရမှုကြောင့် လုံခြုံရေးစခန်းမှာ သိမ်းပိုက်ခံခဲ့ရခြင်းမရှိသော်လည်း အရာခံဗိုလ်တစ်ဦးနှင့် တပ်သားတစ်ဦး ထိခိုက်ဒဏ်ရာများရရှိခဲ့ကာ သေဆုံးခဲ့ကြောင်း သိရသည်။

တရုတ်-မြန်မာသဘာဝဓါတ်ငွေ့ပိုက်လိုင်းအနီးရှိ လုံခြုံရေးစခန်းကို ချင်းကာကွယ်ရေးတပ်-အရှို(CDF-Asho)က ဝင်ရောက် တိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်ကို တွေ့ရှိရသည်။