စော (NSS) - ဩဂုတ် ၁၁

ပဲခူးတိုင်း၊ ကြို့ပင်ကောက်မြို့၌ Hijet ကားတစ်စီး ဝါယာရှော့ဖြစ်ကာ မီးလောင်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ယမန်နေ့(ဩဂုတ်လ ၁၀ ရက်)၊ ည(၇)နာရီဝန်းကျင်အချိန်တွင် ကြို့ပင်ကောက်မြို့၊ ပန်းခြံရှေ့၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း ကြို့ပင်ကောက်နာရေးကူညီမှုအသင်းထံမှ သိရသည်။

အဆိုပါ Hijet ယာဉ်သည် ရန်ကုန်-ပြည်ကားလမ်းမှ ရန်ကုန်သို့ မောင်းလာစဉ် ဝါယာရှော့ဖြစ်ကာ မီးလောင်မှုဖြစ်ပွားခဲ့ကြောင်း သိရသည်။

“သူကမောင်းနေရင်းနဲ့ ကားထဲကအငွေ့တွေထွက်လာပြီး မီးစလောင်တာပါ။ ဝါယာရှော့ ဖြစ်တာပါပဲ။ ကားပေါ်မှာ နှစ်ယောက်ပါလာပါတယ်။ လူတွေကတော့ ထိခိုက်ဒဏ်ရာရရှိမှုမရှိပါဘူး”ဟု ကြို့ပင်ကောက်နာရေးကူညီမှုအသင်းမှ တာဝန်ရှိသူတစ်ဦးက NSS ကိုပြောသည်။

ကားမီးလောင်မှုကြောင့် ထိခိုက်ဒဏ်ရာရရှိမှုမရှိခဲ့သော်လည်း ကားခေါင်းပိုင်းတစ်ခုလုံး မီးလောင်ပျက်စီးဆုံးရှုံးခဲ့ကြောင်း သိရသည်။

အလားတူ ပြီးခဲ့သည့် (ဩဂုတ်လ ၆ရက်)၊ နံနက် (၇)ခွဲအချိန်တွင် မန္တလေးတိုင်း၊ စဉ့်ကူးမြို့နယ်၊ မန္တလေး-မိုးကုတ်လမ်း၌ လိုက်ထရက်ကားတစ်စီး ရှေ့ဘီးပေါက်ကာ တိမ်းမှောက်ပြီး မီးလောင်မှုဖြစ်ပွားခဲ့ကြောင်း သိရသည်။