သန့်ဇင် (NSS) - ဩဂုတ် ၉

ရှမ်းပြည်နယ်၊ အောင်ပန်းမြို့နယ်တွင် အသက်(၁၁)နှစ်အရွယ် ကလေးတစ်ဦး ရေတွင်းတစ်ခု၌ ရေနစ်သေဆုံးမှုဖြစ်ပွားခဲ့ကြောင်း သိရသည်။

ရေနစ်သေဆုံးမှုသည် ယနေ့ (ဩဂုတ်လ ၉ ရက်) နံနက် ၁၀နာရီခွဲအချိန်တွင် ကလောမြို့နယ်၊ အောင် ပန်းမြို့၊ မင်္ဂလာရပ်ကွက်၊ နယ်မြေ(၃)သံလမ်းအနီး၊ ခြံတစ်ခုအတွင်းရှိ ရေတွင်း၌ ဖြစ်ပွားခဲ့ကြောင်း အောင်ပန်းနာရေးကူညီမှုအသင်းထံမှ သိရသည်။

“သူ့မိဘတွေ မရှိချိန်ပေါ့နော်။ ရေတွင်းကသူများခြံထဲကရေတွင်းဗျ။ အဲဒီရေတွင်းက ဘေးကအကာတွေလဲမရှိတော့ ရေခပ်နေရင်းက ခြေချော်ပြီးပြုတ်ကျတာပေါ့” ဟု အောင်ပန်းနာရေးကူညီမှုအသင်းမှ တာဝန်ရှိသူတစ်ဦးက NSS ကိုပြောသည်။

အဆိုပါရေနစ်သေဆုံးသူသည် မင်္ဂလာရပ်ကွက်တွင်နေထိုင်သည့် အသက်(၁၁)အရွယ် မောင်အောင်ရဲလင်းဖြစ်ပြီး သုံးစွဲရေခပ်နေချိန်ပြုတ်ကျသေဆုံးခဲ့ခြင်းဖြစ်ကြောင်း သိရသည်။

“ပထမတော့ ရပ်ကွက်လူထုနဲ့နာရေးအဖွဲ့တွေရှာတော့မတွေ့ဘူးဗျ။ အဲဒါနဲ့ မီးသတ်ကိုခေါ်ပြီးတော့ အကုန်ပေါင်းပြီးရှာတော့မှ ၁၁နာရီ ၁၀မိနစ်မှာ တွေ့တယ်။ ရေတွင်းကပေ(၂၀)လောက်တော့နက်မယ်ဗျ” ဟု ၎င်းကဆက်လက်ပြောသည်။

၎င်းဖြစ်စဉ်မှ ရေနစ်သေဆုံးသွားခဲ့သော မောင်အောင်ရဲလင်းအား အောင်ပန်းမြို့ နာရေးလူမှုကူညီရေးအသင်းမှ လူနာတင်ယာဉ်ဖြင့် အောင်ပန်းပြည်သူ့ဆေးရုံ ရင်ခွဲရုံသို့ပို့ဆောင်ကူညီပေးခဲ့ကြောင်း သိရသည်။