သန့်ဇင် (NSS) - ဩဂုတ် ၁

ရန်ကုန်တိုင်း၊ မင်္ဂလာဒုံမြို့နယ်၊ အောင်မင်္ဂလာအဝေးပြေးကားဝင်းတွင်း၌ အမျိုးသားတစ်ဦး ကိုင်ဆောင်လာသည့် ကြွပ်ကြွပ်အိတ်အတွင်းမှ ငွေကျပ်သိန်း(၄၀၀)ကျော်တန်ဖိုးရှိ စိတ်ကြွရူးသွပ် ဆေးပြားများဖမ်းဆီးရမိခဲ့ကြောင်း သိရသည်။

မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့သည် ယမန်နေ့ (ဇူလိုင်လ ၃၁ ရက်)၊ နံနက် ၁၁နာရီခွဲ အချိန်တွင် မင်္ဂလာဒုံမြို့နယ်၊ အောင်မင်္ဂလာအဝေးပြေးကားဝင်းအတွင်း၌ လမ်းလျှောက်လာသည့် စိုင်းသန်းစိုးကြိုင်ကို စစ်ဆေးရှာဖွေခဲ့ခြင်းဖြစ်သည်။

ထိုသို့ စစ်ဆေးရှာဖွေခဲ့ရာ ၎င်းကိုင်ဆောင်လာသည့် ကြွပ်ကြွပ်အိတ်အတွင်းမှ ငွေကျပ်သိန်း(၄၄၀) တန်ဖိုးရှိ စိတ်ကြွရူးသွပ်ဆေးပြား (၄၄၀၀၀)နှင့် လက်ကိုင်ဖုန်းတစ်လုံးကို သိမ်းဆည်းရမိခဲ့ကြောင်း သိရသည်။

ထို့နောက် ဆက်လက်စစ်ဆေးဖော်ထုတ်ချက်အရ နံနက် ၁၁နာရီ ၄၀မိနစ်အချိန်တွင် စန်းဝင်းအောင်အား အောင်မင်္ဂလာအဝေးပြေးကားဝင်းအတွင်း၌ လက်ကိုင်ဖုန်းတစ်လုံးနှင့်အတူ ထပ်မံဖမ်းဆီးရမိခဲ့ကြောင်း မူးယစ်ဆေးဝါးတားဆီးရေးအဖွဲ့မှ ထုတ်ပြန်ထားသည်။

ထို့ကြောင့် ၎င်းတို့(၂)ဦးအား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေဖြင့် အမှုဖွင့်အရေးယူထားပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော်ထုတ်လျက် ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သတင်းထုတ်ပြန်ထားသည်။