စော (NSS) - ဇူလိုင် ၂၀

ရှမ်းပြည်နယ်၊ တာချီလိတ်မြို့၌ တောင်းရမ်းစားသောက်သည့် တူဝရီး(၂)ဦး ကားတိုက်ခံရပြီး သေဆုံးခဲ့ကြောင်း သိရသည်။

ဖြစ်စဉ်မှာ ယမန်နေ့ (ဇူလိုင်လ ၁၉ ရက်)၊ ည (၁၀)နာရီအချိန်တွင် တာချီလိတ်မြို့အထွက် ဗျူဟာကုန်းအဆင်း၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း ဦးလှမိုး(တာချီလိတ်)လူမှုကူညီရေးအသင်းထံမှ သိရသည်။

“နှစ်ယောက်ကားတိုက်ခံရတာပါ။ လမ်းဘေးမှာနေတဲ့ အမျိုးသားတစ်ယောက်၊ အမျိုးသမီးတစ်ယောက် နှစ်ယောက်ပေါ့။ တောင်းရမ်းစားသောက်တဲ့လူတွေပါ။ သူတို့ကို လမ်းဘေးအမှိုက်ပုံမှာ တွေ့တာပါ”ဟု ဦးလှမိုး(တာချီလိတ်)လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြော သည်။

ကားတိုက်ခံရမှုကြောင့် ဦးခေါင်းတွင် ထိခိုက်ဒဏ်ရာများရရှိခဲ့ကာ အခင်းဖြစ်ပွားရာနေရာ၌ပင် သေဆုံးနေခြင်းဖြစ်ကြောင်း သိရသည်။

သေဆုံးသူ (၂)ဦးသည် မချစ်ခင်ဖူးဝေအောင်(၂ဝ)နှစ်နှင့် ၎င်း၏ ဦးလေးဖြစ်သူ ဦးကျော် (၄၅)နှစ်ဖြစ်ကြောင်း သိရသည်။

အဆိုပါ တူဝရီး(၂)ဦးအား တာချီလိတ်ပြည်သူ့ဆေးရုံရင်ခွဲရုံမှတစ်ဆင့် လက်ရှိတွင် ၎င်းတို့၏ရုပ်အလောင်းအား မီးသဂြိုလ်လိုက်ပြီဖြစ်ကြောင်း သိရသည်။