NSS - ဇူလိုင် ၁၆ 

စစ်ကိုင်းတိုင်း၊ ရွှေဘိုမြို့နယ်ရှိ ရွှေဘိုမြို့မစျေးထဲတွင် ပေါက်ကွဲမှု နှစ်ကြိမ်ဖြစ်ပွားခဲ့ကြောင်း သတင်းရရှိသည်။

ဖြစ်စဥ်မှာ ယနေ့ (ဇူလိုင်လ ၁၆ ရက်)၊ နံနက်(၇)နာရီအချိန်ခန့်တွင် ရွှေဘိုမြို့မစျေး၊ စျေးအိမ်သာအနီးရှိ ငါးတန်းနေရာတွင် မိုင်း(၂)လုံး ပေါက်ကွဲခဲ့ခြင်းဖြစ်ကြောင်း ဒေသခံလူမှုကူညီရေးအသင်းများထံမှ သိရသည်။

“စျေးဖွင့်ချိန်မှာဖြစ်သွားတာပါ။ ကျွန်တော်တို့ကတော့ မိုင်းကွဲပြီးမှ သိတာပါ။ ဒဏ်ရာရတဲ့သူတော့များပါတယ် (၁၂)ယောက်လောက်တော့ ရှိမယ်ထင်တယ်။ ဈေးထဲမှာပဲပေါက်သွားတာ ဈေးဝယ်တွေဘာတွေနဲ့ လူစည်တဲ့အချိန်ကြီး ဖြစ်သွားတာ” ဟု အထက်ပါသတင်းအရင်းအမြစ်က NP News ကိုပြောသည်။

အဆိုပါ ပေါက်ကွဲမှုကြောင့် စုစုပေါင်း (၁၂)ဦးနီးပါး ထိခိုက်ဒဏ်ရာရရှိခဲ့ပြီး လက်ရှိတွင် စိုးရိမ်စရာအခြေအနေမရှိကြောင်း ၎င်းကပြောသည်။

“အရမ်းစိုးရိမ်ရတဲ့သူတော့မပါဘူး သုံးဘီးတွေ၊ ဆိုင်ကယ်တွေနဲ့ သူတို့အစီအစဥ်နဲ့သူတို့ ဆေးရုံသွားကြတဲ့သူလည်းရှိတယ်။ ဆေးရုံနဲ့ ဈေးနဲ့ကလည်း နီးတယ်လေ။ ရွှေဘိုပြည်သူ့ဆေးရုံကြီးကိုပဲ ပို့ကြတာပေါ့” ဟု ၎င်းကဆက်လက်ပြောသည်။

မိုင်းပေါက်ကွဲမှုကြောင့် စျေးအတွင်းရှိနေသည့် ကိုရင် (၁) ပါး အပါအဝင် ကလေးငယ် (၁) ဦး၊ အမျိုးသား (၂) ဦးနဲ့ အမျိုးသမီး (၇) ဦးခန့် ထိခိုက်ဒဏ်ရာရရှိခဲ့ကြောင်း သိရသည်။

 အလားတူ ယမန်နေ့(ဇူလိုင်လ ၁၅ ရက်)ကလည်း ရှမ်းပြည်နယ်၊ လားရှိုးမြို့မဈေး၌ ရပ်ထားသည့် ဆိုင်ကယ်အတွင်းမှ ပေါက်ကွဲမှုဖြစ်ပွားခဲ့ရာ အရပ်သားပြည်သူ (၁၂)ဦး ထက်မနည်း ထိခိုက်ဒဏ်ရာရရှိခဲ့သည်။