Pika (NSS) - ဇူလိုင် ၁၅

မြန်မာအပြည်ပြည်ဆိုင်ရာ လေကြောင်းလိုင်း (Myanmar Airways International - MAI) အနေဖြင့် ကျင့်ဝတ်၊ တာဝန်သိတတ်မှုကို အခြေခံသည့် လုပ်ငန်းအလေ့အထများဖြင့် အထူးသဖြင့် မြန်မာနိုင်ငံမှ ပြည်သူများအတွက် ဝန်ဆောင်မှုပေးခြင်းတို့ကို ဆက်လက်လုပ်ဆောင်သွားမည်ဖြစ်ကြောင်း လေကြောင်းလိုင်းဘက်က အသိပေးထုတ်ပြန်ထားသည်။ 

အလားတူ ပုဂ္ဂလိကပိုင်ဖြစ်သည့် MAI လေကြောင်းလိုင်းသည် စီးပွားဖြစ်လေကြောင်းလိုင်းအဖြစ် ကောင်းမွန်စွာလည်ပတ်နေပြီး ဒေသတွင်းနှင့် နိုင်ငံတကာ လေကြောင်းပို့ဆောင်ရေး၊ သယ်ယူပို့ဆောင်ရေး ဝန်ဆောင်မှုများနှင့် အကူအညီများကို အကောင်းဆုံးပံ့ပိုးကူညီပေးသွားမည်ဖြစ်ကြောင်းလည်း အဆိုပါ ထုတ်ပြန်ချက်တွင် ထည့်သွင်းဖော်ပြထားသည်။

IATA အဖွဲ့ဝင်လေကြောင်းလိုင်းတစ်ခုအဖြစ် နိုင်ငံတကာ စံညွှန်းများကို ချမှတ်ကျင့်သုံးနိုင်ရန် အမြဲကြိုးပမ်းဆောင်ရွက်နေပြီး မြန်မာနိုင်ငံသားများအတွက် သွားလာရလွယ်ကူစေရန် နှင့် နိုင်ငံ၏ လူမှုစီးပွားဖွံ့ဖြိုးတိုးတက်မှုအားလုံးကို မြှင့်တင်ပေးနိုင်ရန် ကြိုးပမ်းနေကြောင်း ထည့်သွင်းပြောကြားထားသည်။ 

MAI လေကြောင်းလိုင်းက "လေကြောင်းလိုင်းရဲ့ ဘဏ်အကောင့်တွေကို လွန်ခဲ့တဲ့(၆)နှစ်တာ ကာလကတည်းက အဆက်မပြတ်ဝန်ဆောင်မှုပေးနေတဲ့ စင်ကာပူအခြေစိုက် United Overseas Bank UOB ဘဏ်ဟာ ပြီးခဲ့တဲ့ရက်ပိုင်းအတွင်းမှာပဲ ဘဏ်အကောင့်တွေကို ပိတ်ဖို့စီစဉ်ခဲ့ပါတယ်။ လေကြောင်းလိုင်းရဲ့ ဘဏ်အကောင့်တွေကို ပိတ်ဖို့ ဆုံးဖြတ်ချက်ကို တကယ်ကို မျှော်လင့်မထားခဲ့ပါဘူး။ MAI လေကြောင်းလိုင်းဟာ လုပ်ငန်းဆက်နွယ်မှုကို ရပ်တန့်ဖို့စီစဉ်နေတဲ့ ဘဏ်ရဲ့ လုပ်ပိုင်ခွင့်အာဏာကို လေးစားပြီး ပေးထားတဲ့ အချိန်ဇယားအတိုင်း လိုက်နာဖို့ ကြိုးပမ်းသွားမှာပါ။ စင်ကာပူအခြေစိုက် UOB ဘဏ်ရဲ့ ဆုံးဖြတ်ချက်ကြောင့် ဖြစ်ပေါ်လာနိုင်တဲ့ အလားအလာရှိတဲ့ ပြဿနာတွေကို ချက်ချင်းဖြေရှင်းနိုင်ဖို့ ခြေလှမ်းတွေကို လုပ်ဆောင်ခဲ့ပါတယ်။ ဖောက်သည်တွေနဲ့ ပေးသွင်းသူတွေအတွက် အဆင်မပြေမှုတွေ မရှိရအောင် လုပ်ငန်းလည်ပတ်မှုတွေ ဆက်လက်တည်တံ့နေဖို့အတွက် အစားထိုး အခြားဘဏ်လုပ်ငန်းဝန်ဆောင်မှုတွေကို လုံခြုံစေဖို့ လုပ်ဆောင်နေပါတယ်။ ကုလသမဂ္ဂက မြန်မာနိုင်ငံနဲ့ပတ်သက်တဲ့ စာတစ်စောင်ကို ထုတ်ပြန်ပြီးတဲ့နောက်မှာ UOB ဘဏ်ရဲ့ ဆုံးဖြတ်ချက်က ထွက်ပေါ်လာတာပါ။ လေကြောင်းလိုင်းတစ်ခုအနေနဲ့ ဥပဒေကို ချိုးဖောက်တာမျိုး ဒါမှမဟုတ် ချမှတ်ထားတဲ့ ပိတ်ဆို့အရေးယူမှုတွေကို ဖောက်ဖျက်တဲ့ လှုပ်ရှားမှုတွေမှာလည်း ပါဝင်ပတ်သက်တာမျိုးလည်းမရှိပါဘူး"ဟု ထုတ်ပြန်ချက်တွင် ဖော်ပြထားသည်။ 

ကိုဗစ်(၁၉)ကပ်ရောဂါကြောင့် လေကြောင်းလိုင်းပျံသန်းမှုများ ရပ်ဆိုင်းထားသည့် အချိန်တွင် MAI လေကြောင်းလိုင်းသည် ခရီးသည်(၂၄၀၀၀၀)နှင့် ကုန်စည်တန်ချိန်(၂၅၄၀၀)ကို ပြန်လည်သယ်ဆောင်လာနိုင်ခဲ့ကြောင်း သိရသည်။ 

"ကပ်ရောဂါကာလအတွင်းမှာ လေကြောင်းလိုင်းဟာ မြန်မာနိုင်ငံသားများစွာကို နေအိမ်ကိုပြန်လည်သယ်ဆောင်လာနိုင်ခဲ့ပါတယ်။ ပြီးတော့ ဒီပြင်းထန်တဲ့ကပ်ရောဂါကို တိုက်ဖျက်ဖို့အတွက် ဆေးဝါးတွေကိုလည်းသယ်ဆောင်လာပေးနိုင်ခဲ့တဲ့အတွက် ကျေးဇူးတင်ခံရမှုတွေကိုလည်းခံခဲ့ရပါတယ်။ ကပ်ရောဂါကာလအတွင်းမှာ လေကြောင်းလိုင်းရဲ့ ဝန်ထမ်း(၁၇၀၀)နဲ့ သူတို့ရဲ့ မိသားစုတွေ စားဝတ်နေရေးအတွက် အကောင်းဆုံးလုပ်ဆောင်ပေးနိုင်ခဲ့တဲ့အတွက်လည်း များစွာဂုဏ်ယူမိပါတယ်"ဟု အသိပေးထုတ်ပြန်ထားသည်။ 

လေကြောင်းလိုင်း စတင်ခဲ့သည့်အချိန်မှ နှစ်ပေါင်း(၃၀)အတွင်း၌ စီးပွားရေးကန့်သတ်ချက်များ၊ အခြားစိန်ခေါ်မှုများရှိနေသော်လည်း MAI လေကြောင်းလိုင်းသည် မြန်မာနိုင်ငံတွင်း ပျံသန်းမှုနှင့်  အပြည်ပြည်ဆိုင်ရာ ပျံသန်းမှုများကို ဆက်လက်လည်ပတ်သွားမည်ဖြစ်ကြောင်း ထုတ်ပြန်ထားသည်။