သန့်ဇင်(NSS) - ဇူလိုင် ၁၀

ရှမ်းပြည်နယ်(အရှေ့ပိုင်း)၊ တာချီလိတ်မြို့ရှိ KTV၊ CLUB နှင့် BAR တို့တွင်ရောင်းချနေသည့် ငွေကျပ်သိန်း(၆၀၀၀)ကျော်တန်ဖိုးရှိ စိတ်ပြောင်းဆေးများ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့မှထုတ်ပြန်ထားသည်။

ပြီးခဲ့သော ဇူလိုင်လ ၆ ရက်၊ ညနေ ၆နာရီခွဲအချိန်တွင် တာချီလိတ်မြို့၊ ဆေးခမ်းရပ်ကွက်၌ အထက်ပါကဲ့သို့ ဖမ်းဆီးရမိခဲ့ကြောင်း သိရသည်။

အဆိုပါရပ်ကွက်၌ စိုင်းဝန်းကျောက် မောင်းနှင်လာသည့် TOYOTA REVO ကားကို သတင်းအရ မူးယစ်တပ်ဖွဲ့ဝင်များက စစ်ဆေးရှာဖွေခဲ့ကြောင်း သိရသည်။

ထိုသို့စစ်ဆေးရှာဖွေခဲ့ရာ ၎င်းကားပေါ်မှ ကာလတန်ဖိုးငွေကျပ်သိန်း(၆၄၀၀)ကျော်တန်ဖိုးရှိ စိတ်ပြောင်းဆေး(Happy Water) ၅ ဒသမ ၉ ကီလို သိမ်းဆည်းရမိခဲ့ကြောင်း သိရသည်။

ထို့နောက် ဆက်လက်စစ်ဆေးဖော်ထုတ်ချက်အရ အဆိုပါ စိတ်ပြောင်းဆေး(Happy Water)များကို တာချီလိတ်မြို့ရှိ KTV /CLUB /BAR နှင့် စားသောက်ဆိုင်များတွင် လူငယ်များအား ဖြန့်ဖြူးရောင်းချခြင်းဖြစ်ကြောင်း သိရသည်။

ထို့ကြောင့် ၎င်းအား ဥပဒေအရအရေးယူထားပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့က သတင်းထုတ်ပြန်ထားသည်။