NSS - ဇူလိုင် ၁ဝ

ကရင်ပြည်နယ်၊ ဘားအံ-သထုံကားလမ်းပေါ်ရှိ တံတားတစ်စင်းကို အကြမ်းဖက်အဖွဲ့က ယနေ့(ဇူလိုင်လ ၁ဝ ရက်)၊ နံနက် ၁ နာရီအချိန်ခန့်တွင် မိုင်းထောင်ဖောက်ခွဲခဲ့ကြောင်း သတင်းရရှိသည်။

မိုင်းထောင်ဖောက်ခွဲခံခဲ့ရသည့်တံတားသည် ကရင်ပြည်နယ်၊ ဘားအံမြို့နယ်၊ နောင်ကျန်ကျေးရွာအုပ်စု၊ ဂူဝကျေးရွာအနီး၊ ဘုရင့်ညီနောင်ဂူနှင့်ဝါးဘိုးတောလမ်းဆုံကြားရှိ တံတားအမှတ်(၁/၁၃)ဖြစ်ကြောင်း သိရသည်။

ထိုသို့ မိုင်းထောင်ဖောက်ခွဲခံရမှုကြောင့် တံတားအောက်ခြေတိုင်၊ တံတားကြမ်းခင်း နှင့် တံတားလက်ရမ်းများ ထိခိုက်ပျက်စီးမှုများရှိခဲ့ကြောင်း ဒေသခံများက အသိပေးပြောဆိုထားသည်။

“တံတားဖောင်တွေ၊ လက်ရမ်းတွေ၊ အောက်ခြေတွေ ပျက်စီးသွားတာရှိတယ်။ တံတားကြမ်းခင်းတွေလည်း နည်းနည်းအက်ကွဲသွားတာရှိတယ်။ လောလောဆယ်တော့ သွားလို့လာလို့တော့ အဆင်ပြေသေးတယ်လို့ ပြောရမယ်။ ကားကြီးတွေရော၊ ကားလေးတွေရော အကုန်လုံး တံတားတစ်ခြမ်းကို ပေးသွားနေတာရှိပါတယ်” ဟု ဒေသခံတစ်ဦးက NP News ကို ပြောသည်။

လက်ရှိအချိန်တွင် ၎င်းတံတားပေါ်မှ ကားကြီး၊ ကားလေးများ ဖြတ်သန်းသွားလာနေလျက်ရှိကြောင်း သိရသည်။

ယခုရက်ပိုင်းအတွင်း၌ မြဝတီ-ဘားအံ-သထုံ-ရန်ကုန်ကားလမ်းပေါ်ရှိ တံတားအစင်းရေ(၃)စင်းထက်မနည်းသည် အကြမ်းဖက်သမားများ၏ မိုင်းခွဲဖျက်ဆီးခြင်းများကို ခံထားရသည်။

ထို့ပြင် တံတားများကို အကြမ်းဖက်သမားများက မိုင်းခွဲဖျက်ဆီးမှုနှင့် ပစ်ခတ်တိုက်ခိုက်မှုဖြစ်စဉ်များအတွင်း လူသေဆုံးမှု နှင့် ထိခိုက်ဒဏ်ရာရရှိမှုများလည်း ရှိနေသည်။