NSS - ဇူလိုင် ၇

မွန်ပြည်နယ်၊ ကျိုက်ထိုမြို့နယ်၊ ကျိုက်ထီးရိုးဘုရား တောင်တက်လမ်းပေါ်ရှိ တံတားတစ်စင်းကို PDF ပူးပေါင်းအဖွဲ့ မိုင်းခွဲဖျက်ဆီးခဲ့ပြီးနောက် ဘုရားဖူးအသွားအလာများ ရပ်တန့်နေကြောင်း သတင်းရရှိသည်။

PDF ပူးပေါင်းအဖွဲ့သည် ယမန်နေ့(ဇူလိုင် ၆ ရက်) ညနေ ၃ နာရီခွဲအချိန်ခန့်တွင် ကျိုက်ထီးရိုးဘုရားတောင်တက် လမ်းပေါ် တံတားတစ်စင်းကို မိုင်းထောင်ကာ ဖောက်ခွဲဖျက်ဆီးခဲ့ခြင်းဖြစ်ကြောင်း မွန်ပြည်နယ်အစိုးရအဖွဲ့မှ တာဝန်ရှိသူက NP News ကို အတည်ပြုပြောထားသည်။

"မနေ့က ညနေ ၃ နာရီ ၂ဝ လောက်မှာ မိုင်းနဲ့ခွဲပြီး ဖျက်ဆီးလိုက်တာ။ ကျိုက်ထီးရိုးတောင်ပေါ်တက်လို့ရှိရင် ၁ဝ မိနစ်နားပြီး ကားတွေ ခဏစောင့်ပြီး နားတဲ့စခန်းရှိတယ်လေ။ အဒီအပေါ်ဘက်နားမှာရှိတဲ့ ရေဖြတ်တံတားလေး ပေါ့။ အဲဒီတံတားလေးကို ခွဲပစ်လိုက်တာ။ သွားလို့တော့ မရတော့ဘူးလေ။ ကျွံကျသွားတာပေါ့" ဟု အထက်ပါ တာဝန်ရှိသူက ပြောသည်။

ထိုသို့ တံတားမှာ မိုင်းခွဲဖျက်ဆီးခံခဲ့ရပြီးနောက် ဘုရားဖူးပြည်သူ (၂ဝ)ခန့်သည် တောင်ပေါ်၌ ပိတ်မိနေခဲ့ကြောင်း သိရသည်။

လက်ရှိအချိန်တွင် ကျိုက်ထီးရိုးဘုရားသို့ နေ့စဥ် ဘုရားဖူးဦးရေမှာ ၂ဝဝ နီးပါးခန့် လာရောက်လျက်ရှိပြီး တောင်ကားအစီးရေ ၁ဝ စီးထက်မနည်းဖြင့် ပို့ဆောင်ပေးနေရလျက်ရှိ ကြောင်း သိရသည်။

"နည်းနည်းတော့ အခက်အခဲဖြစ်သွားတာပေါ့။ နေ့စဥ်ဘုရားဖူးရှိနေတယ်။ နေ့စဥ်ဘုရားဖူးက ကား ၁ဝ စီး၊ ၁၅ စီး တက်တာရှိတော့ လူကလည်း ၁ဝဝ၊ ၂ဝဝ နေ့စဥ်ရှိတာပေါ့။ အဲဒီအချိန်က ဆင်းတဲ့အချိန်ဆိုတော့ အပေါ်မှာ လူတော့ သိပ်မကျန်တော့ဘူး။ ဒါပေမယ့် ၂ဝ လောက်ရှိနေတယ် ပြောတယ်။ အဲဒီလူတွေက ကျန်ခဲ့တော့ ဒီနေ့ အပေါ်က ကားလည်း ဆင်းလာ၊ အောက်ကလည်း သွားကြိုပေးမယ်ပေါ့" ဟု မွန်ပြည်နယ်အစိုးရအဖွဲ့မှ တာဝန်ရှိသူ က ဆိုသည်။

လက်ရှိတွင် မိုင်းခွဲဖျက်ဆီးခံခဲ့ရသည့်တံတားအား ဘေလီတံတားဖြင့် ပြန်လည်ပြင်ဆင်နေကာ ကျိုက်ထီးရိုးဘုရား ဂေါပက အဖွဲ့၏ ပိုက်ဆံဖြင့် ဆောင်ရွက်နေကြောင်း သိရသည်။

"လောလောဆယ်တော့ ဘေလီနဲ့ပဲ ပြန်လုပ်မှာပေါ့။ လာမယ့် ဘုရားဖူးတွေကတော့ ခဏတော့ စောင့်ရမှာပေါ့။ ဒီတံတားပြီးမှပဲ တက်လို့ရမှာပေါ့။ ဘရားဖူးက အမြဲရှိတယ်။ ထိုင်းနိုင်ငံသားတွေက အမြဲလာတယ်။ ဒါတွေက မဖြစ်သင့်တဲ့နေရာတွေကိုလုပ်နေတာဆိုတော့ ဘုရားဖူးတွေအတွက် အဆင်မပြေသလို၊ အရောင်းအဝယ် လုပ်နေ တဲ့သူတွေ၊ ကားအသင်းတွေကို အခက်အခဲဖြစ်စေတာပဲ။ ဒါတွေက ဘယ်လိုမှ မလုပ်သင်တဲ့နေရာ"ဟု အထက်ပါ တာဝန်ရှိသူက ပြောသည်။

ကျိုက်ထီးရိုးဘုရား တောင်တက်ကားလမ်းပေါ်ရှိ တံတားတစ်စင်း မိုင်းခွဲဖျက်ဆီးခံရမှုကြောင့် လက်ရှိအချိန်တွင် ဘုရားဖူးအသွားအလာများ ရပ်တန့်နေလျက်ရှိကြောင်း သိရသည်။