စော (NSS) - ဇွန် ၂၇

မလေးရှားနိုင်ငံတွင် နေထိုင်သည့် မြန်မာနိုင်ငံသားအမျိုးသားတစ်ဦး ပိန္နဲသီးတက်ခူးရာမှ အပင်ပေါ်မှ ပြုတ်ကျကာ သေဆုံးခဲ့ကြောင်း သတင်းရရှိသည်။

ဖြစ်စဥ်မှာ ပြီးခဲ့သည့် ဇွန်လ(၂၅)ရက်တွင် ဖြစ်ပွားခဲ့ကြောင်း နှလုံးလှပရဟိတလူငယ်များသွေးအလှူရှင်များအဖွဲ့မှ အသိပေးထုတ်ပြန်ထားသည်။

မလေးရှားနိုင်ငံ၊ ချဲရတ်မြို့၊ ယူလစ်တွင်‌ နေထိုင်သည့် ကိုမင်းမင်းဦးသည် ပိန္နဲသီးတက်ခူးရာမှလမ်းဘေးရှိမြောင်းထဲသို့ပြုတ်ကျခဲ့ပြီး ဦးခေါင်းတွင် ထိခိုက်ဒဏ်ရာများ ရရှိခဲ့ကြောင်း သိရသည်။

ဖြစ်စဥ်ကြောင့် ဦးမင်းမင်းဦးတွင် ဦးခေါင်းသွေးထွက်လွန်ကာ ဆေးရုံသို့ ရောက်ခါနီး၌သေဆုံးသွားကြောင်း သိရသည်။

အဆိုပါအမျိုးသားသည် ၎င်း၏အလုပ်ပိတ်ရက်တွင် လမ်းဘေး၌ပေါက်နေသည့် သစ်ပင်ပေါ်မှ သစ်သီးများအား ခူးယူကာ အိမ်နီးနားချင်းများအား ပေးလေ့ရှိကြောင်း အထက်ပါအသင်းထံမှ သိရသည်။

သေဆုံးသူသည် အသက်(၂၉)နှစ်အရွယ် ကိုမင်းမင်းဦးဖြစ်ပြီး ပဲခူးတိုင်း၊ ပဲခူးမြို့နယ်၊ အင်းတကော်တွင် နေထိုင်ခဲ့သူတစ်ဦးဖြစ်ကြောင်း သိရသည်။