မျိုးကြီး (NSS) - ဇွန် ၂၇

မူးယစ်ဆေးဝါးတိုက်ဖျက်ရေးကို အစိုးရ၊ တပ်မတော်တို့နှင့် ပူးပေါင်းဆောင်ရွက်ရန် ကြိုးပမ်းခဲ့သော်လည်း လက်တွေ့မဖော်ဆောင်နိုင်ခဲ့ကြောင်း RCSS လက်နက်ကိုင်အဖွဲ့က ဆိုသည်။

ရှမ်းလက်နက်ကိုင်အဖွဲ့တစ်ခုဖြစ်သည့် ရှမ်းပြည်ပြန်လည်ထူထောင်ရေးကောင်စီ(RCSS)က ယမန် နေ့(ဇွန်လ ၂၆ ရက်)တွင် အပြည်ပြည်ဆိုင်ရာမူးယစ်ဆေးဝါးတိုက်ဖျက်ရေးနေ့နှင့်ပတ်သက်၍ ကြေညာ ချက်ထုတ်ပြန်ရာတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

RCSS/SSA အနေဖြင့် မူးယစ်ဆေးဝါးအန္တရာယ် တားဆီးကာကွယ်ရေးလုပ်ငန်းများကို ချမှတ်ထားသည့် မူဝါဒနှင့်အညီ ဆောင်ရွက်လျက်ရှိကြောင်းနှင့် နောင်တွင်လည်း ဆက်လက်ဆောင်ရွက်သွားမည်ဖြစ် ကြောင်း ကြေညာထားသည်။

ထို့ပြင် လွန်ခဲ့သောနှစ်များ၌ ၎င်းတို့အနေဖြင့် မူးယစ်ဆေးဝါးတိုက်ဖျက်ရေးလုပ်ငန်းနှင့်ပတ်သက်၍ အစိုးရ၊ တပ်မတော်၊ UNODC တို့နှင့် လက်တွဲပူးပေါင်းဆောင်ရွက်ရန် ကြိုးပမ်းခဲ့သော်လည်း လက်တွေ့အကောင်အထည်ဖော်ဆောင်နိုင်ခြင်းမရှိခဲ့ကြောင်း ထည့်သွင်းထုတ်ပြန်ထားသည်ကို တွေ့ရှိရသည်။

ပြီးခဲ့သော ၂ဝ၂၂-၂ဝ၂၃ တစ်နှစ်တာကာလအတွင်း RCSS အနေဖြင့် စိတ်ကြွဆေးပြား လေးသိန်းခွဲကျော်နှင့် အိုက်စ် ၁ဝဝဝ ကီလိုဂရမ်နီးပါးဖမ်းဆီးရမိခဲ့သည်ဟုလည်း ထည့်သွင်းကြေညာထားသည်။

လက်ရှိတွင် မြန်မာနိုင်ငံ ဒေသအသီးသီး၌ မူးယစ်ဆေးဝါးရောင်းဝယ်မှုနှင့် သုံးစွဲမှုများ ပျံ့နှံ့လျက်ရှိနေသည့်အပြင် ဘိန်းစိုက်ပျိုးမှုများသည်လည်း ဆက်လက်ရှိနေသေးကြောင်း RCSS က ဆိုထားသည်။

RCSS/SSA သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို လက်မှတ်ရေးထိုးထားသည့် လက်နက်ကိုင်အဖွဲ့အစည်းတစ်ခုဖြစ်ပြီး လက်ရှိ နစကနှင့်လည်း ငြိမ်းချမ်းရေးဆွေးနွေးမှုများ ပြုလုပ်လျက်ရှိနေသည်။

မြန်မာနိုင်ငံတွင် အစိုးရအဆက်ဆက်နှင့် တိုင်းရင်းသားလက်နက်ကိုင်အဖွဲ့အကြား ငြိမ်းချမ်းရေးဆွေးနွေးခဲ့သည်မှာ နှစ်ပေါင်း (၃၃)နှစ်ရှိခဲ့ပြီဖြစ်သော်လည်း လက်ရှိအချိန်ထိ စစ်မှန်သော ငြိမ်းချမ်းရေးကို ရရှိခံစားနိုင်ခြင်း မရှိသေးပေ။

တိုင်းရင်းသားလက်နက်ကိုင်အဖွဲ့ အများစုသည် အမြတ်ကြီးမားသော မူးယစ်ဆေးဝါးလုပ်ငန်းများကို မစွန့်လွှတ်နိုင်သည့်အတွက် ငြိမ်းချမ်းရေးကို အချိန်ဆွဲနေခြင်းဖြစ်ကြောင်း နစကဘက်က ပြစ်တင်ဝေဖန်ထားသည်။