NSS - ဇွန် ၂၆

အငြိမ်းစားရဲအုပ်ဖြစ်သူနှင့် ရဲဒုတပ်ကြပ်(နယ်ထိန်း)ဖြစ်သူတို့ သေနတ်ဖြင့် ပစ်ခတ်သတ်ဖြတ်ခံခဲ့ရမှု ပဲခူးတိုင်း၊ သဲကုန်းမြို့နယ်၊ ဆင်မြီးဆွဲမြို့၌ ဖြစ်ပွားခဲ့ကြောင်း သတင်းရရှိသည်။

ဖြစ်စဉ်မှာ ယနေ့(ဇွန်လ ၂၆ ရက်)၊ နံနက် ၈ နာရီအချိန်ခန့်တွင် ဆင်မြီးဆွဲမြို့၊ ဖောင်ကွေ့လမ်းစာကြည့် တိုက်အနီး၌ အထက်ပါကဲ့သို့ ဖြစ်ပွားခဲ့ခြင်းဖြစ်ကြောင်း ဒေသခံသတင်းအရင်းအမြစ်များက NP News ကို ပြောသည်။

အငြိမ်းစားရဲအုပ်ဖြစ်သူ ဦးစိုးသက်အောင်နှင့် ရဲဒုတပ်ကြပ်(နယ်ထိန်း)ဖြစ်သူ ကျော်ကျော်စိုးတို့သည် နေအိမ်အပြင်ဘက်သို့ ထွက်ခွာလာစဉ်အချိန်တွင် ဆိုင်ကယ်မောင်းနှင်လာသည့် အမျိုးသား(၂)ဦးက သေနတ်ဖြင့် ပစ်ခတ်သွားခဲ့ခြင်းဖြစ်ကြောင်း ဒေသခံများက ဆိုသည်။

ထိုသို့ ပစ်ခတ်ခံရမှုကြောင့် အငြိမ်းစားရဲအုပ်ဖြစ်သူ ဦးစိုးသက်အောင်သည် ကျည်ဖောက်ဝင်ဒဏ်ရာများရရှိခဲ့ကာ နေရာ၌ပင် သေဆုံးသွားခဲ့ကြောင်း သိရသည်။

ထို့ပြင် ပစ်ခတ်ခံရမှုကြောင့် ကျည်ဖောက်ဝင်ဒဏ်ရာများရရှိခဲ့သော ရဲဒုတပ်ကြပ်ကျော်ကျော်စိုးသည် ဆေးရုံသို့ ပို့ဆောင်ကုသပေးစဉ်အချိန်တွင် သေဆုံးသွားခဲ့ကြောင်း သိရသည်။

အဆိုပါ အငြိမ်းစာရဲအုပ်နှင့် ရဲဒုတပ်ကြပ်ကို ပေါင်းတည်မြို့နယ်ပြည်သူ့ကာကွယ်ရေးအဖွဲ့ PDF က ပစ်ခတ်တိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်ကို တွေ့ရှိရသည်။