ယွန်း (NSS) - ဇွန် ၂၅

ရန်ကုန်မြို့ရှိ တက္ကစီယာဥ်စီးခများကို တစ်ကီလိုလျှင်(၆ဝဝ)နှုန်းဖြင့် သတ်မှတ်လိုက်ကြောင်း ရန်ကုန် တိုင်းဒေသကြီး ပုဂ္ဂလိကသယ်ယူပို့‌ဆောင်ရေးကြီးကြပ်မှုကော်မတီ(YRTC) ထံမှ သိရသည်။

အဆိုပါ သတ်မှတ်ချက်ကို ယခုဇွန်လအတွင်း Yangon City Taxi အသင်းမှ အဆိုပြုခဲ့ခြင်းဖြစ်ပြီး ပြီးခဲ့သည့် ဇွန်လ(၂၃)ရက်တွင် ၎င်းအဆိုပြုချက်ကို အသိပေးပြောဆိုလိုက်ခြင်းဖြစ်ကြောင်း YRTC မှ တွဲဖက်အတွင်းရေးမှူး ဦးလျန်ကျင့်မန်ထံမှ သိရသည်။

တက္ကစီယာဥ်မောင်းနှင့် ခရီးသည်များ နှစ်ဦးနှစ်ဖက်အဆင်ပြေစေရေးအတွက် အဆိုပါ သတ်မှတ်ချက်ကို ထုတ်ပြန်ခဲ့ခြင်းဖြစ်ပြီး လက်ရှိတွင် စတင်ကျင့်သုံးနေပြီဖြစ်ကြောင်း သိရသည်။

“တက္ကစီငှားမယ်ဆိုရင် အခြေခံသတ်မှတ်ထားတဲ့ ဈေးနှုန်းမရှိတော့ ယာဥ်မောင်းကလည်း ပြောချင်သလောက်တွေပြောတယ်။ အဓိကတော့ ခရီးသည်နဲ့ ယာဥ်မောင်းကြားမှာ သင့်တင်မျှတတဲ့နှုန်းမျိုး ဖြစ်အောင်သတ်မှတ်လိုက်တာပေါ့”ဟု ဦးလျန်ကျင့်မန်က NP News ကိုပြောသည်။

အဆိုပါ သတ်မှတ်ချက်အရ ခရီးသည်များကို တက္ကစီပေါ်စတက်သည်နှင့် ငွေကျပ် (၁၅ဝဝ)နှုန်း သတ် မှတ်ထားပြီး တစ်ကီလိုခရီးသွားပြီးတိုင်း ငွေကျပ်(၆ဝဝ)နှုန်းပေးဆောင်ရမည်ဖြစ်ကြောင်း ၎င်းက ဆက်လက်ပြောဆိုထားသည်။

ထို့ပြင် အပလီကေးရှင်းဖြင့် ဝန်ဆောင်မှုပေးနေသည့် ကုမ္ပဏီများအနေဖြင့်လည်း ယခုသတ်မှတ်ထားသည့် နှုန်းထားအတိုင်းသာ ကောက်ခံရမည်ဖြစ်ကြောင်း သိရသည်။

လက်ရှိတွင် ရန်ကုန်တိုင်းအတွင်း၌ တက္ကစီယာဥ်ပေါင်း ခြောက်သောင်းကျော်ရှိသော်လည်း City Taxi အဖြစ်မှတ်ပုံတင်ထားသည့် ယာဥ်အစီးရေမှာ သုံးသောင်းကျော်သာ ရှိနေသေးကြောင်း ဦးလျန်ကျင့်မန်က ပြောသည်။