စော (NSS) - ဇွန် ၁၉

မန္တလေးတိုင်း၊ ပြည်ကြီးတံခွန်မြို့နယ်၊ (ဇ)ရပ်ကွက်ရှိ ဆိုင်ကယ်အပိုပစ္စည်းများ သိုလှောင်ထားသည့် နေအိမ်တွင် မီးကြွင်းမီးကျန်မှ တစ်ဆင့် မီးလောင်မှု ထပ်မံဖြစ်ပွားခဲ့ကြောင်း သိရသည်။

အဆိုပါ (ဇ)ရပ်ကွက်၊ (၆၃)(A)လမ်း (၁၃၂)လမ်းထောင့်ရှိ နေအိမ်သည် ယမန်နေ့ (ဇွန်လ ၁၈ ရက်)၊ ည (၈)နာရီခွဲဝန်းကျင်အချိန်၌ မီးလောင်မှုဖြစ်ပွားခဲ့ကြောင်း မန္တလေးတိုင်းဒေသကြီး မီးသတ်ဦးစီးမှူးရုံး(ဗဟို)ထံမှ သိရသည်။

ဆိုင်ကယ်အပိုပစ္စည်းများ သိုလှောင်ထားသည့် နေအိမ်အပေါ်ထပ်ရှိ ဝါယာကြိုးများ ပေါက်ပြဲရာမှ တစ်ဆင့် မီးလောင်မှုဖြစ်ပွားခဲ့ခြင်းဖြစ်ပြီး  (၂)နာရီကျော်ကြာ မီးငြှိမ်းသတ်ခဲ့ရကြောင်း သိရသည်။

ထို့ပြင် အဆိုပါ နေအိမ်သည် ယနေ့(ဇွန်လ ၁၉ ရက်)၌ကျန်ရှိနေသည့် မီးကြွင်းမီးကျန်များကြောင့် မီးလောင်မှု ထပ်မံဖြစ်ပွားခဲ့ကြောင်း သိရသည်။

“မနေ့ညကစလောင်တာက ဆိုင်ကယ်အပို ပစ္စည်းဂျပ်ဖာတွေကိုထားရင်းနဲ့ ဝါယာကြိုးကိုဖိမိတာ။ ဖိမိတော့ ကြိုးတွေကပေါက်ပြီး လောင်တာပါ။ ဒီနေ့က မီးကြွင်းမီးကျန်ကနေ မီးခိုးထွက်ပြီး မီးလန့်တာပါ”ဟု မန္တလေးတိုင်းဒေသကြီး မီသတ်ဦးစီးမှူးရုံး (ဗဟို)မှ တာဝန်ရှိသူတစ်ဦးက NP News ကိုပြောသည်။

၎င်းနေအိမ်သည် ယနေ့ မွန်းလွဲ(၁)နာရီဝန်းကျင်အချိန်တွင် ထပ်မံလောင်ကျွမ်းခဲ့ပြီး မွန်းလွဲ(၂)နာရီခွဲဝန်းကျင်တွင် မီးငြှိမ်းသတ်နိုင်ခဲ့ကြောင်း သိရသည်။

အဆိုပါမီးလောင်မှုကြောင့် ထိခိုက်ဒဏ်ရာရရှိသူမရှိကြောင်း ၎င်းကဆက်လက်ပြောဆိုထားသည်။