သန့်ဇင် (NSS) - ဇွန် ၁၈

မန္တလေးတိုင်း၊ မြင်းခြံမြို့နယ်ရှိ မြင်းခြံ-တောင်သာကားလမ်းဘေး၌ လက်လုပ်မိုင်း(၆)လုံးအပါအဝင် အခြားဆက်စပ်ပစ္စည်းများ ထပ်မံသိမ်းဆည်းရမိခဲ့ကြောင်း မြန်မာနိုင်ငံရဲတပ်ဖွဲ့မှ သတင်းထုတ်ပြန်ထားသည်။

ပြီးခဲ့သော ဇွန်လ(၁၅)ရက်၊ မွန်းတည့်(၁၂)နာရီ အချိန်တွင် မန္တလေးတိုင်း၊ မြင်းခြံမြို့နယ်၊ မြင်းခြံ-တောင်သာသာ ကားလမ်းဘေး၌ သိမ်းဆည်းရမိခဲ့ကြောင်း သိရသည်။

ဖြစ်စဉ်မှာ မြင်းခြံမြို့နယ်၊ ဂွေးပင်ရိုးကျေးရွာအနီး၌ ရဲတပ်ဖွဲ့ဝင်များက လုံခြုံရေးလုပ်ငန်းများ ဆောင်ရွက်နေစဉ် PDF အဖွဲ့မှထောင်ထားသော ဖောက်ခွဲရေးပစ္စည်းများအား တွေ့ရှိခဲ့ကြောင်း မြန်မာနိုင်ငံရဲတပ်ဖွဲ့မှ ထုတ်ပြန်ထားသည်။

အဆိုပါဖောက်ခွဲရေး ပစ္စည်းများထဲတွင် လက်လုပ်မိုင်း(၆)လုံး၊ ဆိုင်ကယ် ဘက်ထရီအိုး (၄)လုံးနှင့် ဝိုင်ယာကြိုး ကိုက်(၁ဝဝ)ခန့်တို့အား ရှာဖွေတွေ့ရှိခဲ့ကြောင်း သိရသည်။

မြင်းခြံမြို့နယ်တွင် ပြီးခဲ့သော ဇွန်လ(၁၁)ရက်နှင့်(၁၃)ရက်များ၌လည်း အလားတူဖောက်ခွဲရေးပစ္စည်းများ ရှာဖွေတွေ့ရှိခဲ့ကြောင်းလည်း ဆက်စပ်သိရှိရသည်။

အထက်ပါဖြစ်စဉ်နှင့်ပက်သက်၍ သိမ်းဆည်းရမိခဲ့သော လက်လုပ်မိုင်းများနှင့် ဆက်စပ်ပစ္စည်းများကို လုံခြုံရေးတပ်ဖွဲ့ဝင်များက ထိန်းသိမ်းရှင်းလင်းခဲ့ပြီး နယ်မြေဒေသတည်ငြိမ်အေးချမ်းရေးအတွက် လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း မြန်မာနိုင်ငံရဲတပ်ဖွဲ့မှ ဆိုသည်။