ဂျန်ဇက် (NSS) - ဇွန် ၁၇

ထိုင်းရွေးကောက်ပွဲမှာ မဲအများဆုံးရရှိခဲ့တဲ့ Move Forward ပါတီ ဦးဆောင်တဲ့ (၈)ပါတီညွန့်ပေါင်း အဖွဲ့ဟာ လာမယ့် ဇွန်လ ၂ဝ ရက်ကနေ ၂၂ ရက်အတွင်းကျင်းပဖို့စီစဉ်ထားတဲ့ အစိုးရသစ်ဖွဲ့စည်းပုံများကို ဆွေးနွေးဖို့ အစီအစဉ်ကို ရွှေ့ဆိုင်းလိုက်ကြောင်းသိရပါတယ်။

ထိုင်းရွေးကောက်ပွဲကော်မရှင်ဟာ မေလ ၁၄ ရက်က ကျင်းပခဲ့တဲ့ထိုင်းရွေးကောက်ပွဲနဲ့ပတ်သက်ပြီး တရားဝင်ရလဒ်များကို မေလ ၂၁ ရက်မှာထုတ်ပြန်ကြေညာဖွယ်ရှိနေတဲ့အတွက် ၈ ပါတီ ညွန့်ပေါင်းအစိုးရဖွဲ့စည်းရေး ဆွေးနွေးမယ့်အစီအစဉ်များကိုရွှေ့ဆိုင်းလိုက်တာဖြစ်ပါတယ်။ ထိုင်းရွေးကောက်ပွဲကော်မရှင်က ရွေးကောက်ပွဲရလဒ်များကို တရားဝင်ကြေညာချိန်မှသာ ရလဒ်များ အတည်ဖြစ်မှာဖြစ်ပါတယ်။ ရွေးကောက်ပွဲကော်မရှင်ဟာ အောက်လွှတ်တော်ရှိ ကိုယ်စားလှယ်ပေါင်း ၅ဝဝ ရဲ့ အမည်စာရင်းများကို ထုတ်ပြန်ကြေညာသွားမှာဖြစ်ကြောင်း၊ ရွေးကောက်ပွဲမှာ မဲအငြင်းပွားမှုများနဲ့ပတ်သက်ပြီး အမှုပေါင်း ၇၁ မှုကို စစ်ဆေးလျက်ရှိနေကြောင်း သိရပါတယ်။ 

ရွေးကောက်ပွဲမှာအငြင်းပွားမှုများဖြစ်ပွားနေခြင်းနဲ့ပတ်သက်ပြီး စစ်ဆေးခံနေရတဲ့ကိုယ်စားလှယ်တွေထဲမှာ  Bhumjaithai  ပါတီက ၂၁ ဦး၊ ဖြူထိုင်းပါတီက ၁၇ ဦး၊ ပလန်ပရာချက်ရက်ပါတီက ၁၆ ဦးနဲ့ Move Forward ပါတီက ၆ ဦး၊ ဒီမိုကရက်တစ်ပါတီ နဲ့ ညီညွတ်သောထိုင်းအမျိုးသားပါတီက ၃ ဦးစီ ပါဝင်နေတဲ့အပြင် Pheu Thai Ruam Palang ပါတီကတစ်ဦး၊ Thai Sang Thai ပါတီက နှစ်ဦးတို့ ပါဝင်နေကြောင်း သိရပါတယ်။ 

ထိုင်းဖွဲ့စည်းပုံအခြေခံဥပဒေထဲမှာ လွှတ်တော်နှစ်ရပ်ပေါင်း ၃၇၆ မဲရမှသာ ဝန်ကြီးချုပ်နဲ့ အစိုးရအဖွဲ့ ဖွဲ့စည်းနိုင်မှာဖြစ်ရာ Move Forward ပါတီဟာ ရွေးကောက်ပွဲမှာအနိုင်ရတဲ့ အခြားပါတီ ၇ ပါတီနဲ့မဟာမိတ်ဖွဲ့စည်းထားပေမယ့် စစ်တပ်ကျောထောက်နောက်ခံပေးထားတဲ့ပါတီတွေနဲ့ မဟာမိတ်ဖွဲ့စည်းထားခြင်းမျိုးမရှိကြောင်းသိရပါတယ်။