Pearl (NSS) - ဇွန် ၁၄

ရန်ကုန်တိုင်း၊  ဒဂုံမြို့သစ်(တောင်ပိုင်း)တွင် စက်ရုံလုံခြုံရေးဝန်ထမ်းအား သတ်၍ စက်ရုံအတွင်းမှ ဝါယာကြိုးများ ခိုးယူမှုဖြစ်ပွားခဲ့ကြောင်း သတင်းရရှိသည်။ 

ဖြစ်စဉ်မှာ ယနေ့ (ဇွန်လ ၁၄ ရက်) ၊ နံနက် (၉) နာရီ အချိန်ခန့်တွင် ဒဂုံမြို့သစ်(တောင်ပိုင်း)၊ စက်မှုဇုန် ၁ ၊ စစ်တွေလမ်းနှင့် ထားဝယ်လမ်းထောင့်ရှိ စက်ရုံတစ်ခုတွင် ဖြစ်ပွားခဲ့ကြောင်း သိရသည်။ 

အဆိုပါ စက်ရုံရှိ လုံခြုံရေးဝန်ထမ်းအမျိုးသားတစ်ဦးအား လည်ပင်းကိုကြိုးဖြင့်ညှစ်၍ သတ်ခဲ့ပြီးနောက် စက်ရုံအတွင်းရှိ ကြေးနန်း နှင့် ဝါယာကြိုးများ ခိုးယူသွားခဲ့ကြောင်း သိရသည်။ 

"အလောင်းရှိတယ်ဆိုလို့ လှမ်းခေါ်လို့ ကျွန်တော်တို့သွားတာ။ ပြီးတော့ Dead Body ကောက်ပြီး ဆေးရုံပို့ပေးလိုက်တာ။ သတ်သွားတဲ့လူကိုတော့ မိလား၊မမိလား ကျွန်တော်တို့ မသိပါဘူး"ဟု ရှင်သန်ခွင့် လူမှုကူညီရေးအသင်း၏ တာဝန်ရှိသူတစ်ဦးက NP News ကိုပြောသည်။ 

ဖြစ်စဉ်ကြောင့် အသက် (၅၇)နှစ် အရွယ်ရှိ စက်ရုံလုံခြုံရေးဝန်ထမ်းအမျိုးသား သေဆုံးသွားခဲ့ပြီး လက်ရှိတွင် ၎င်းရုပ်အလောင်းအား စံပြဆေးရုံ ရင်ခွဲရုံသို့ ပို့ဆောင်ပေးထားကြောင်း သိရသည်။