NP News - ဇွန် ၄

ရန်ကုန်-ပြည် ကားလမ်း၌ ယနေ့ (ဇွန်လ ၄ ရက်) နံနက်အစောပိုင်းတွင် (၁၂)ဘီးကားက (၂၂)ဘီးကားကို ဝင်တိုက်၍ (၂)ဦး ထိခိုက်ဒဏ်ရာရရှိခဲ့ကြောင်း သိရသည်။  

ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ သပြေစမ်းရွာအနီး၊ ရန်ကုန်-ပြည်ကားလမ်း ၊ မိုင်တိုင်အမှတ် ၁ဝဝ /၁ အနီးတွင် ယနေ့ နံနက် ၆ နာရီခန့်က  Hino Profia အဖြူရောင်( ၁၂)ဘီးယာဉ်မှ (၂၂)ဘီးယာဉ်အား ဝင်တိုက်မှုဖြစ်ပွါးခဲ့ခြင်းဖြစ်သည်။ 

ယင်း ဖြစ်စဉ်ကို မင်းလှမြို့နယ်မီးသတ်တပ်ဖွဲ့မှ  ရှာဖွေကယ်ဆယ်ရေးလုပ်ငန်းများဆောင်ရွက်ပေးခဲ့ပြီး အဆိုပါယာဉ်တိုက်မှုကြောင့် Hino Profia အဖြူရောင်( ၁၂)ဘီးယာဉ်ပေါ်ပါ အမျိုးသား (၂)ဦးထိခိုက်ဒဏ်ရာရရှိခဲ့ကြောင်း သိရသည်။

ထို့ကြောင့် မင်းလှမြို့နယ်လူမှုကူညီရေးအသင်းယာဉ်ဖြင့်သာယာဝတီပြည်သူ့ဆေးရုံကြီးသို့ပို့ဆောင်ပေးခဲ့ကြောင်း မီးသတ်တပ်ဖွဲ့က ထုတ်ပြန်ထားသည်။ 

ထိခိုက် ဒဏ်ရာရရှိခဲ့သူများသည် စိုးရိမ်ရသည့် အခြေအနေမရှိကြောင်း သိရသည်။