Pearl (NP News) - ဇွန် ၃

ထားဝယ်-မြိတ်ကားလမ်းတွင် အကြမ်းဖက်သမားများမှ မော်တော်ယာဉ်အား လက်နက်ငယ်များဖြင့်ပစ်ခတ်မှုကြောင့် အမျိုးသားတစ်ဦးသေဆုံးသွားခဲ့ကြောင်း မြန်မာနိုင်ငံရဲတပ်ဖွဲ့ထံမှ သတင်းရရှိသည်။ 

ဖြစ်စဉ်မှာ ယမန်နေ့ (ဇွန်လ ၂ရက်)၊ နံနက် ၆ နာရီ ၄၅ မိနစ်အချိန်တွင် တနင်္သာရီတိုင်း ၊ သရက်ချောင်းမြို့နယ်၊ စုံစင်ဖျားကျေးရွာ၊ ထားဝယ်-မြိတ် ကားလမ်း၊ မိုင်တိုင်အမှတ် ၃၃ မိုင် ၄ ဖာလုံအနီး၌ ဖြစ်ပွားခဲ့ကြောင်း သိရသည်။ 

မြိတ်မြို့နယ်၊ စန္ဒဝတ်ကျေးရွာနေ ဦးစန်နီ (ခ)မြတ်သူမောင်းနှင်ပြီး ကျောက်ဖြူကျေးရွာနေသူများဖြစ်ကြသည့် ဦးစိုးသိန်း ၊ မယုဝတီလှိုင် နှင့် မနွယ်နီဝင်းတို့ စီးနင်းလိုက်ပါလျက် ဖရဲသီးများတင်ဆောင်လာသည့် Light Truck အမျိုးအစား မော်တော်ယာဉ်သည် ထားဝယ်မြို့မှ မြိတ်မြို့သို့ထွက်ခွာလာခဲ့ကြောင်း သိရသည်။ 

ထိုသို့ ထွက်ခွာလာစဉ် အခင်းဖြစ်နေရာ အရောက်၌  PDF အမည်ခံ အကြမ်းဖက်အဖွဲ့အင်အား (၅)ဦးခန့်က လက်နက်ငယ်များဖြင့် ပစ်ခတ်ထွက်ပြေးသွားခဲ့ကြောင်း ရဲတပ်ဖွဲ့မှ ဆိုသည်။ 

ပစ်ခတ်ခံရမှုကြောင့် ဦးစန်နီ(ခ)မြတ်သူတွင် ကျည်ထိမှန်ဒဏ်ရာများရရှိကာ အခင်းဖြစ်နေရာ၌ သေဆုံးခဲ့ကြောင်း သိရသည်။

အထက်ပါဖြစ်စဉ်နှင့်ပတ်သက်၍ ကျူးလွန်သူများအား ဖော်ထုတ်ဖမ်းဆီး၍ ဥပဒေနှင့်အညီ အပြစ်ပေးအရေးယူနိုင်ရေး လုံခြုံရေးတပ်ဖွဲ့ဝင်များက ဆက်လက်ဆောင်ရွက်လျက်ရှိကြောင်း ရဲတပ်ဖွဲ့မှ ထုတ်ပြန်ထားသည်။