စော (NP News) - ဇွန် ၁

ရှမ်းပြည်နယ်၊ လားရှိုးမြို့၊ လားရှိုးမြို့ရှောင်လမ်းမကြီးတွင် ယာဉ်တိုက်မှုဖြစ်ပွားခဲ့ရာ အမျိုးသား(၁)ဦး သေဆုံးခဲ့ပြီး (၃)ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယနေ့(ဇွန်လ ၁ ရက်)၊ နံနက်(၁ဝ)နာရီခွဲဝန်းကျင်အချိန်တွင် လားရှိုးမြို့ရှောင်လမ်းမကြီး၊ မိုင်တိုင်(၁၁/၁)၌ ဖြစ်ပွားခဲ့ကြောင်း လားရှိုးမြို့နယ်လူငယ်လူမှုကူညီရေးအသင်းထံမှ သိရသည်။

“အတက်ကားနှင့် အဆင်းကားတိုက်ကြတာပါ။ ကျွန်တော်တို့ရောက်တဲ့အချိန်တော့ လူနာတွေကလမ်းမှာပြန့်ကျဲနေတာမို့ လူနာကိုပဲဂရုစိုက်လိုက်တာပါ။ HIJETပေါ်က အမျိုးသား(၄)ဦး ထိခိုက်ဒဏ်ရာရသွားပါတယ်။ တစ်ဦးကတော့ ဆေးရုံရောက်ပြီး (၂)နာရီအကြာမှာ ဆုံးသွားပါတယ်”ဟု လားရှိုးမြို့နယ်လူငယ်လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

သေဆုံးသူအမျိုးသားသည် အသက်(၄၅)ဝန်းကျင်အရွယ်ရှိပြီး ဦးခေါင်းတွင် ထိခိုက်ဒဏ်ရာ ပြင်းထန်စွာရရှိခဲ့ကြောင်း ၎င်းကဆက်လက်ပြောဆိုထားသည်။

ထိခိုက်ဒဏ်ရာရရှိသူများသည် နောင်ချိုမြို့တွင်‌ နေထိုင်သူများဖြစ်ကြပြီး လက်ရှိတွင် လားရှိုးပြည်သူ့ဆေးရုံသို့ ပို့ဆောင်ထားကြောင်း သိရသည်။