ရောင်နီ (NSS) - စက်တင်ဘာ ၂၂ 

တရုတ်နိုင်ငံရှိ ဂွမ်ဒေါင်းပြည်နယ်ရှိ၊ တိရစ္ဆာန်ရုံတစ်ခုမှာ ပန်ဒါပုံစံ ဆေးခြယ်ထားတဲ့ ခွေးလေးနှစ်ကောင်ဟာ လာရောက်လည်ပတ်သူတွေကြား ရေပန်းစားနေပါတယ်။

ဂွမ်ဒေါင်းပြည်နယ် တောင်ပိုင်းမှာ တည်ရှိတဲ့ အဆိုပါတိရစ္ဆာန်ရုံကို လာရောက်လည်ပတ်သူတစ်ဦး ရိုက်ကူးထားတဲ့ ဗီဒီယိုမှာ နိုင်ငံရဲ့အမျိုးသား တိရစ္ဆာန် ပန်ဒါဝက်ဝံတွေနဲ့ ဆင်တူအောင်ခြယ်သထားတဲ့ Chow Chow ခွေးတွေကို မြင်တွေ့ရပြီး အဲဒီဗီဒီယိုဟာ တရုတ်နိုင်ငံရဲ့ဗီဒီယိုပလက်ဖောင်း Douyin မှာ Share ၁ ဒသမ ၄  သန်းကျော်ထိ ရရှိခဲ့ပါတယ်။ 

ဆိုရှယ်မီဒီယာမှာ အခြားအသုံးပြုသူတစ်ဦးက မျှဝေထားတဲ့ ဓာတ်ပုံတစ်ပုံမှာလည်း "ဆေးခြယ်ထားသော ခွေးများ” ဆိုတဲ့ ဆိုင်းဘုတ်နဲ့ အဖြူအမည်း ခွေး ၂ ကောင်ကို အကာအရံခြံတစ်ခုမှာ မြင်တွေ့ရပါတယ်။ "ငါတို့ကို Panda Dogs လို့ခေါ်ပါတယ်။ Chow Chow ခွေးကို ပန်ဒါနဲ့တူအောင် ဆေးဆိုးထားတာပါ။ ငါတို့က နူးညံ့တယ်၊ စမတ်ကျတယ်၊ ဖော်ရွေတယ်၊ ချစ်စရာကောင်းတယ်" ဆိုတဲ့ ဆိုင်းဘုတ်လည်း တွေ့ရပါတယ်။

တရုတ်နိုင်ငံမှာ ပန်ဒါနဲ့တူအောင် ခွေးတွေကို ဆေးခြယ်ခြင်းဟာ ဒါပထမဆုံးအကြိမ်တော့ မဟုတ်ပါဘူး။ မေလ ကလည်း ဂျန်ဆုပြည်နယ် အရှေ့ပိုင်းရှိ တိရစ္ဆာန်ရုံတစ်ရုံမှာ ခွေးနှစ်ကောင်ကို ပန်ဒါဝက်ဝံတွေနဲ့ တူအောင် ဆေးခြယ်ပြီး လာရောက်လည်ပတ်သူတွေကို ဆွဲဆောင်ခဲ့ပါတယ်။