ရောင်နီ (NSS) - စက်တင်ဘာ ၂၂ 

ဂျပန်နိုင်ငံ အလယ်ပိုင်း၊ အိုက်ရှီကာဝါမှာ မကြုံစဖူး မိုးသည်းထန်စွာရွာသွန်းခြင်းကြောင့် လူထောင်ပေါင်းများစွာ နေရာရွှေ့ပြောင်းခဲ့ရပြီး လူတစ်ဦး သေဆုံးကာ အနည်းဆုံး လူ ခုနှစ်ဦး ထက်မနည်း ပျောက်ဆုံးနေတယ်လို့ စက်တင်ဘာ ၂၁ ရက်က တာဝန်ရှိသူတွေက ပြောကြားခဲ့ပါတယ်။ 

ဂျပန်နိုင်ငံအလယ်ပိုင်း အနောက်ဘက်ကမ်းရိုးတန်းရှိ မြစ်နေရာ တစ်ဒါဇင်ထက်မနည်းမှာ စက်တင်ဘာ ၂၁ ရက်၊ ဒေသစံတော်ချိန် နံနက် ၁၁ နာရီက ကမ်းပါးပြိုကျမှုဖြစ်ခဲ့တယ်လို့ မြေယာဝန်ကြီးဌာနမှ တာဝန်ရှိသူ မာဆာရုကို ဂျီမာ က ပြောကြားခဲ့ပါတယ်။ မိုးသည်ထန်စွာရွာသွန်းခြင်းကြောင့် အိုက်ရှီကာဝါမှာ လူတစ်ဦးသေဆုံးပြီး သုံးဦး ပျောက်ဆုံးနေကာ လူနှစ်ဦး ဒဏ်ရာအပြင်းအထန်ရရှိခဲ့တယ်လို့ ဒေသဆိုင်ရာအစိုးရရဲ့ထုတ်ပြန်ချက်မှာ ဖော်ပြ ထားပါတယ်။ 

အိုက်ရှီကာဝါဒေသရဲ့၊ ဝါဂျီမာမြို့မှာလည်း လမ်းပြင် အလုပ်သမား လေးဦး ပျောက်ဆုံးနေတယ်လို့ သိရပါတယ်။ ကယ်ဆယ်ရေးသမားတွေက အခင်းဖြစ်ပွားရာ နေရာကို သွားနေပေမယ့် မြေပြိုမှုတွေကြောင့် လမ်းခရီးပိတ်ဆို့မှု တွေဖြစ်နေပါတယ်။ အဆောက်အဦးအများအပြား ရေနစ်မြုပ်ခဲ့ပြီး လျှပ်စစ်မီးမရရှိတဲ့ အိမ်ထောင်စု ၆၀၀၀ ခန့် ရှိနေကာ ရေမရရှိတဲ့ အိမ်ထောင်စုအရေအတွက် မသိရသေးဘူးလို့ အိုက်ရှီကာဝါအစိုးရက ထုတ်ပြန်ချက်မှာ ဖော်ပြထားပါတယ်။

ဝါဂျီမာ နဲ့ ဆုဇူ မြို့တွေအပြင် နိုတိုမြို့မှာလည်း ဒေသခံ ၄၄,၇၀၀ ခန့်ကို ဘေးလွတ်ရာသို့ ရွှေ့ပြောင်းဖို့ အမိန့်ပေး ထားပြီး အိုက်ရှီကာဝါ  မြောက်ဘက် နီဂါတာနဲ့ ရာမာဂါတာ စီရင်စုများမှ အခြားနေထိုင်သူ ၁၆,၇၀၀ ကိုလည်း ဘေးလွတ်ရာ ရွှေ့ပြောင်းခိုင်းခဲ့တယ်လို့  မီးသတ်နဲ့ သဘာဝဘေးအန္တရာယ်စီမံခန့်ခွဲရေးအေဂျင်စီက ပြောကြားခဲ့ပါ တယ်။